സംസ്ഥാന സീനിയര്‍ ടീമിന് വേണ്ടി പോലും കളിക്കാത്ത താരം; ഐ പി എല്ലിൽ അത്ഭുതം തീർത്ത് വിഘ്നേഷ് പുത്തൂറിന്റെ പ്രകടനം

ചെന്നൈ: ഐപിഎല്ലില്‍ സ്വപ്‌ന അരങ്ങേറ്റം കുറിച്ച് മലയാളി താരം വിഘ്നേഷ് പുത്തൂര്‍. രോഹിത് ശര്‍മയ്ക്ക് പകരം മുംബൈ ഇന്ത്യന്‍സിന്റെ ഇമ്പാക്ട് പ്ലയെര്‍ ആയി ഇറങ്ങിയ താരം മിന്നും പ്രകടനമാണ് നടത്തിയത്. ചെന്നൈ നായകന്‍ റിതുരാജ് ഗെയ്ക്വാദിനെയും അപകടകാരിയായ ശിവം ദുബെയെയും ദീപക് ഹൂഡയെയും വീഴ്ത്തിയാണ് വിഘ്‌നേഷ് മലയാളികളുടെ അഭിമാനമായി മാറിയിരിക്കുന്നത്. നാലോവര്‍ എറിഞ്ഞ താരം 32 റണ്‍സ് വിട്ടുകൊടുത്ത് മൂന്ന് വിക്കറ്റ് നേടി.

സംസ്ഥാന സീനിയര്‍ ടീമിന് വേണ്ടി പോലും കളിക്കാത്ത താരത്തെ മുംബൈ ടീമിലെടുത്തപ്പോള്‍ അത്ഭുതപ്പെട്ടവര്‍ക്കുള്ള മറുപടി കൂടിയായിരുന്നു ഈ പ്രകടനം. ലെഫ്റ്റ് ആം അണ്‍ ഓര്‍ത്തഡോക്‌സ് ചൈനമാന്‍ ബോളറാണ് വിഘ്നേഷ്. അടിസ്ഥാന വിലയായ 30 ലക്ഷം രൂപയ്ക്കാണ് മുംബൈ ഇന്ത്യന്‍സ് ടീമിലെത്തിച്ചത്. ഏറ്റവും അവസാന ഘട്ടത്തിലാണ് വിഗ്‌നേഷിന്റെ പേര് ഉയര്‍ന്നത്. കേരള ക്രിക്കറ്റ് ലീഗ് ടി20 ടൂര്‍ണമെന്റിന്റെ പ്രഥമ സീസണിലാണ് വിഘ്നേഷിന്റെ കഴിവ് പുറംലോകം കണ്ടത്. ഈ വര്‍ഷം നടന്ന കെസിഎല്ലില്‍ ആലപ്പി റിപ്പിള്‍സിന്റെ താരമായിരുന്ന വിഗ്‌നേഷിനെ മുംബൈ ട്രയല്‍സിന് ക്ഷണിച്ചിരുന്നു.