കർണാടകയിലേക്കുള്ള ബസ് സർവീസ് നിർത്തിവെച്ച് മഹാരാഷ്ട്ര

മഹാരാഷ്ട്ര: അയൽസംസ്ഥാനത്ത് മഹാരാഷ്ട്ര സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ്റെ ബസ് ആക്രമിക്കപ്പെട്ടതിനെ തുടർന്ന് കർണാടകയിലേക്കുള്ള സംസ്ഥാന ട്രാൻസ്പോർട്ട് ബസുകൾ താൽക്കാലികമായി നിർത്തിവയ്ക്കാൻ മഹാരാഷ്ട്ര ഗതാഗത മന്ത്രി പ്രതാപ് സർനായിക് ശനിയാഴ്ച ഉത്തരവിട്ടു. രാത്രി ബംഗളൂരുവിൽ നിന്ന് മുംബൈയിലേക്ക് പോവുകയായിരുന്ന ബസിനുനേരെ കന്നഡ അനുകൂലികൾ ആക്രമിക്കുകയായിരുന്നു. വെള്ളിയാഴ്ച രാത്രി 9.10 ഓടെ ചിത്രദുർഗയിൽ വച്ചായിരുന്നു സംഭവം.

ഡ്രൈവർ ഭാസ്‌കർ ജാദവിന്റെ മുഖത്ത് കറുപ്പ് തേക്കുകയും അദ്ദേഹത്തെ ആക്രമിക്കുകയും ചെയ്തുവെന്നും മന്ത്രി പറഞ്ഞു. കർണാടക സർക്കാർ ഈ വിഷയത്തിൽ നിലപാട് വ്യക്തമാക്കാതെ ബസ് സർവീസുകൾ പുനരാരംഭിക്കില്ലെന്നും അദ്ദേഹം വ്യക്തമാക്കി. അക്രമികൾ വാഹനം നശിപ്പിക്കുകയും ചെയ്തു. ആക്രമണം സംബന്ധിച്ച് കർണാടക പോലീസ് കേസെടുത്തു. സംഭവത്തിൽ കർണാടക സർക്കാർ നിലപാട് വ്യക്തമാക്കുന്നത് വരെ മഹാരാഷ്ട്ര കർണാടകയിലേക്കുള്ള ബസ് സർവീസ് പുനരാരംഭിക്കില്ലെന്ന് സർനായിക് പറഞ്ഞു.

അതേ ദിവസം, കർണാടക സർക്കാർ ഉടമസ്ഥതയിലുള്ള ട്രാൻസ്‌പോർട്ട് കോർപ്പറേഷൻ ബസിലെ ഒരു കണ്ടക്ടറെ മഹാരാഷ്ട്ര അതിർത്തിയിലുള്ള ജില്ലാ ആസ്ഥാന നഗരമായ ബെലഗാവിയുടെ പ്രാന്തപ്രദേശത്ത് വെച്ച് മറാത്തി ഭാഷയിൽ ഒരു പെൺകുട്ടിയോട് മറുപടി പറയാത്തതിന് മർദ്ദിച്ചു.ചിത്രദുർഗയിൽ എംഎസ്ആർടിസി ബസിനു നേരെയുണ്ടായ ആക്രമണം കണ്ടക്ടറെ മർദിച്ചതിനുള്ള പ്രതികാരമാണോയെന്ന് വ്യക്തമല്ല. ബെലഗാവിയിൽ ഗണ്യമായ മറാത്തി സംസാരിക്കുന്ന ജനസംഖ്യയുണ്ട്, അവരിൽ ഒരു വിഭാഗം ആളുകൾ ജില്ലയെ മഹാരാഷ്ട്രയുമായി ലയിപ്പിക്കണമെന്ന് ആവശ്യപ്പെടുന്നു. കർണാടകയും അവിടെ താമസിക്കുന്ന കന്നഡ ജനതയും ഇതിനെ ശക്തമായി എതിർക്കുന്നു.