ക്യാമറകളില്‍ വമ്പന്‍ അപ്‌ഡേറ്റ്; ദാ വന്നു ഐഫോണ്‍ എസ്ഇ

കാലിഫോര്‍ണിയ: ആപ്പിളിന്‍റെ ഐഫോണ്‍ എസ്ഇ എത്തി. ഇതിന്റെ ക്യാമറ ഫീച്ചറുകളാണ് ശ്രദ്ധാകേന്ദ്രമാകുന്നത്. കമ്പനി എപ്പോഴും ക്യാമറയില്‍ കാത്തുവച്ചിരുന്ന മാജിക് ഇത്തവണയുമുണ്ടാകും എന്ന പ്രതീക്ഷയിലാണ് ഫോൺ പ്രേമികൾ. 2022ല്‍ പുറത്തിറങ്ങിയ ഐഫോണ്‍ എസ്ഇ മൂന്നാം തലമുറയുമായി താരതമ്യം ചെയ്യുമ്പോള്‍ ഐഫോണ്‍ എസ്ഇ 4-ന്‍റെ ക്യാമറകളില്‍ വമ്പന്‍ അപ്‌ഡേറ്റുകളാണ് വരികയെന്നാണ് സൂചിപ്പിക്കുന്നത്.

മുന്‍ഗാമിയായ ഐഫോണ്‍ എസ്ഇ മൂന്നാം തലമുറയിലെ പോലെ ഐഫോണ്‍ എസ്ഇ 4ലും സിംഗിള്‍ റീയര്‍ ക്യാമറയാണുണ്ടാവുക. എന്നാല്‍ എസ്ഇ 3യിലെ 12 എംപി ക്യാമറയ്ക്ക് പകരം എസ്ഇ 4ല്‍ ഇടംപിടിക്കുക 48 എംപിയുടെ ഉഗ്രന്‍ ക്യാമറയാണെന്ന് ഇതിനകം വ്യക്തമായിട്ടുണ്ട്. ഐഫോണ്‍ 15, ഐഫോണ്‍ 16 എന്നീ പ്രീമിയം ഫോണുകളിലേതിന് സമാനമായ പ്രൈമറി ക്യാമറയാണിത്. 4K റെക്കോര്‍ഡിംഗും വീഡിയോ നിലവാരമുയര്‍ത്തുന്ന ഡോള്‍ബി വിഷനും ഈ ക്യാമറയ്ക്കൊപ്പമുണ്ടാകാന്‍ ഇടയുണ്ട്.

ഐഫോണ്‍ 16ലും ഐഫോണ്‍ 16 പ്ലസിലും ആപ്പിള്‍ അവതരിപ്പിച്ച ഫ്യൂഷന്‍ ക്യാമറ ടെക്നോളജി ഐഫോണ്‍ എസ്ഇ 4ലേക്ക് വരുമോയെന്ന് വ്യക്തമല്ല. ടെലിഫോട്ടോ ലെന്‍സില്ലാതെ തന്നെ 2x സൂം ഉറപ്പുവരുത്തുന്നതായിരുന്നു ഫ്യൂഷന്‍ ക്യാമറ. ഐഫോണ്‍ 16 സീരീസില്‍ ആപ്പിള്‍ ആദ്യമായി കൊണ്ടുവന്ന ക്യാമറ ബട്ടണ്‍ എസ്ഇ 4ല്‍ കാണുമോ എന്നതിനും സ്ഥിരീകരണമില്ല.