അദാനി ഗ്രൂപ്പിന് തിരിച്ചടി; വൈദ്യുതി വാങ്ങൽ കരാർ പിൻവലിച്ച് ശ്രീലങ്കൻ സർക്കാർ

ഇന്ത്യൻ കമ്പനിയായ അദാനി ഗ്രൂപ്പുമായുള്ള വൈദ്യുതി വാങ്ങൽ കരാർ പിൻവലിച്ച് ശ്രീലങ്കൻ സർക്കാർ. അഴിമതി ആരോപണത്തെത്തുടർന്നാണ് നടപടി. ശ്രീലങ്കൻ ഊർജ മന്ത്രാലയത്തെ ഉദ്ധരിച്ച് വിവിധ വാർത്താ ഏജൻസികളാണ് ഇക്കാര്യം റിപ്പോർട്ട് ചെയ്തത്. ശതകോടീശ്വരൻ ഗൗതം അദാനി നയിക്കുന്ന അദാനി ഗ്രൂപ്പിന് ഏറ്റ കനത്ത തിരിച്ചടിയാണിത്.

ഗൗതം അദാനിക്കെതിരെ കഴിഞ്ഞ വർഷം അവസാനം അമേരിക്കയിൽ കൈക്കൂലി ആരോപണം ഉയർന്നതിനെത്തുടർന്ന് കമ്പനിയുടെ പ്രാദേശിക പദ്ധതികളെക്കുറിച്ച് ശ്രീലങ്കൻ പ്രസിഡൻ്റ് അനുര കുമാര ദിസനായകെയുടെ ഭരണകൂടം അന്വേഷണം ആരംഭിച്ചു.
അദ്ദേഹത്തിൻ്റെ മുൻഗാമിയുടെ ഭരണകൂടം 2024 മെയ് മാസത്തിൽ ദ്വീപ് രാഷ്ട്രത്തിൻ്റെ വടക്കുപടിഞ്ഞാറൻ ഭാഗത്ത് ഇനിയും നിർമ്മിക്കാനിരിക്കുന്ന അദാനി കാറ്റാടി പവർ കോംപ്ലക്സിൽ നിന്ന് ഒരു കിലോവാട്ടിന് 0.0826 യുഎസ് ഡോളറിന് വൈദ്യുതി വാങ്ങാൻ സമ്മതിച്ചിരുന്നു.

എന്നാൽ ഈ ഇടപാടുമായി മുന്നോട്ട് പോകേണ്ടതില്ലെന്ന് ദിസനായകെയുടെ മന്ത്രിസഭ ഈ മാസം ആദ്യം തീരുമാനിച്ചതായി ഊർജ മന്ത്രാലയത്തിലെ ഉന്നത ഉദ്യോഗസ്ഥൻ പറഞ്ഞു. “സർക്കാർ വൈദ്യുതി വാങ്ങൽ കരാർ റദ്ദാക്കി, പക്ഷേ പദ്ധതി റദ്ദാക്കിയിട്ടില്ല. മുഴുവൻ പദ്ധതിയും അവലോകനം ചെയ്യാൻ ഒരു കമ്മിറ്റിയെ നിയോഗിച്ചിട്ടുണ്ട്” പേരു വെളിപ്പെടുത്താത്ത വ്യവസ്ഥയിൽ എഎഫ്‌പിയോട് സംസാരിച്ച ഉറവിടം പറയുന്നു.