16 ലിറ്റർ ചാരായവുമായി രണ്ട് പേർ പിടിയിൽ

എക്‌സൈസ് ഇൻസ്പെക്ടർ കെ ശ്യാംകുമാറിന്റെ നേതൃത്വത്തിൽ നടത്തിയ റെയ്ഡിൽ 16 ലിറ്റർ ചാരായവുമായി രണ്ട് പേർ പിടിയിലായി. കാട്ടാക്കട അഞ്ചുതെങ്ങിൻമൂട്ടിൽ നിന്ന് മാരുതി കാറിൽ കടത്തുകയായിരുന്നു പിടികൂടിയ അരക്ക. നിരവധി അബ്കാരി കേസുകളിൽ പ്രതിയായ നെടുമങ്ങാട് സ്വദേശി നൗഷാദ് ഖാൻ, പെരിങ്ങമല സ്വദേശി അലി ജാസിം എന്നിവരാണ് അറസ്റ്റിലായത്. ഇരുവരെയും കോടതി റിമാൻഡ് ചെയ്തു.
പ്രിവന്റീവ് ഓഫീസർ ബി വിജയകുമാർ, സിവിൽ എക്സൈസ് ഓഫീസർമാരായ പി ശങ്കർ, എം വിശാഖ്, കെ ആർ രജിത്ത്, ഹരിപ്രസാദ് എസ്, സുജിത്ത് വി എസ്, അനീഷ് വി ജെ എന്നിവർ എക്സൈസ് സംഘത്തിലുണ്ടായിരുന്നു.

നെടുമങ്ങാട് എക്‌സൈസ് സർക്കിൾ ഇൻസ്‌പെക്ടർ മിഥിൻ ലാലിന്റെ നേതൃത്വത്തിൽ നടത്തിയ മറ്റൊരു പരിശോധനയിൽ അഞ്ച് ലിറ്റർ ചാരായവും 350 ലിറ്റർ വാഷ്, ബ്രൂവിംഗ് ഉപകരണങ്ങളും പിടികൂടി. നിരവധി അബ്കാരി കേസുകളിൽ പ്രതിയായ കല്ലിയോട് സ്വദേശി രാജേഷാണ് അറസ്റ്റിലായത്. പിരപ്പൻകോട് പേരയത്തുമുഗലിൽ വാടകയ്ക്ക് വീട് എടുത്ത് വിൽപന നടത്തി വരികയായിരുന്നു.