സ്വകാര്യബസ് കടയിലേക്ക് ഇടിച്ചുകയറി അപകടം

ഓയൂർ : വെളിയത്ത്‌ സ്വകാര്യബസ് അടച്ചിട്ടിരുന്ന കടയിലേക്ക് ഇടിച്ചുകയറി. ബസ് കാത്തുനിന്ന വിദ്യാർഥികൾ ഉൾപ്പെടെയുള്ളവർക്ക് പരിക്കേറ്റു. ചൊവ്വാഴ്ച വൈകീട്ട് നാലരയോടെ വെളിയം മാവിള ജങ്‌ഷനിലായിരുന്നു അപകടം ഉണ്ടായത്.ഓയൂരിൽ നിന്നു കൊട്ടാരക്കരയ്ക്കു പോകുകയായിരുന്നു ബസാണ് അപകടം ഉണ്ടായത്.

അപാകത്തിൽ ബസ് ഡ്രൈവർക്കും പരിക്കേറ്റു.സാരമായി പരിക്കേറ്റ ഐ.ടി.ഐ.വിദ്യാർഥി ഉമേഷിനെ തിരുവനന്തപുരം മെഡിക്കൽ കോളേജ് ആശുപത്രിയിലും മറ്റുള്ളവരെ താലൂക്ക് ആശുപത്രിയിലും പ്രവേശിപ്പിച്ചു. ഐ.ടി.ഐ.വിട്ട് വീട്ടിലേക്ക്‌ പോകാൻ മാവിള പെട്രോൾ പമ്പിനു സമീപത്തെ ബസ് സ്റ്റോപ്പിൽ നിൽക്കുകയായിരുന്നു വിദ്യാർഥികൾ. വണ്ടി വരുന്നതുകണ്ട് മറ്റുള്ളവർ ഓടിമാറിയതിനാൽ അപകടത്തിന്റെ തീവ്രത കുറഞ്ഞു.

അപകടത്തിൽ കടയുടെ ഷട്ടറും കോൺക്രീറ്റ് ഷേഡും ബീമും തകർന്നു. അപകടസമയത്ത് രണ്ടുകടകളും തുറന്നിരുന്നില്ല. ഡ്രൈവർക്ക് ദേഹാസ്വാസ്ഥ്യമുണ്ടായതിനെത്തുടർന്ന് ബസിന്റെ നിയന്ത്രണം നഷ്ടപ്പെടുകയായിരുന്നെന്ന് യാത്രക്കാർ പറഞ്ഞു.