മുകേഷ് പ്രതിഷേധങ്ങൾക്കിടെ തിരുവനന്തപുരം വിട്ടു

തിരുവനന്തപുരം: മുകേഷിന്റെ രാജി ആവശ്യപ്പെട്ട് സംസ്ഥാനത്ത് പ്രതിഷേധങ്ങൾ നടക്കുന്നതിനിടെ മുകേഷ് തിരുവനന്തപുരത്തെ വീട്ടിൽ നിന്ന് മടങ്ങി . വൻ പോലീസ് സുരക്ഷയിലായിരുന്നു മുകേഷിന്റെ മടക്കയാത്ര . അതേസമയം മുകേഷ് സ്വവസതിയിയായ കൊല്ലത്ത് പോകാതെ കൊച്ചിയിലേക്ക് പോയി എന്നാണ് പുറത്ത് വരുന്ന സൂചന . അടുപ്പക്കാരായ ചില സിപിഎം നേതാക്കളുമായി ആശയവിനിമയം നടത്തിയ ശേഷമാണു മുകേഷ് കൊച്ചിയിലേക്കു തിരിച്ചുവെന്നാണ് ലഭിക്കുന്ന വിവരം .

അതേസമയം മുകേഷിന്‍റെ രാജി ആവശ്യപ്പെട്ട് സംസ്ഥാനത്ത് നടക്കുന്ന പ്രതിഷേധങ്ങളെ മുൻനിർത്തി സിപിഎം സംസ്ഥാന സെക്രട്ടേറിയറ്റ് ഇന്നു തിരുവനന്തപുരത്ത് ചേരുന്നുണ്ട്. ധാർമികത മുൻനിർത്തി മുകേഷ് മാറി നിൽക്കണമെന്ന സിപിഐ നിലപാട് സംസ്ഥാന സെക്രട്ടറി ബിനോയ് വിശ്വം മുഖ്യമന്ത്രിയെ കണ്ട് അറിയിച്ചിരുന്നു. സമാന കേസുകളിൽ പ്രതികളായ രണ്ട് കോൺഗ്രസ് എംഎൽഎമാർ രാജിവെച്ചിട്ടില്ലെന്നും അതുകൊണ്ടുതന്നെ മുകേഷിന്‍റെ രാജി ആവശ്യമില്ലെന്നുമാണ് സിപിഎമ്മിന്‍റെ നിലപാട്.

ഇന്ന് കൊല്ലം ജില്ലാ കമ്മിറ്റിയുടെ മഹിളാ കോൺഗ്രസ്‌ ആനന്ദവല്ലീശ്വരത്തെ എംഎൽഎ ഓഫിസിലേക്ക് മാർച്ച് സംഘടിപ്പിക്കും. പിന്നാലെ മുകേഷിന്‍റെ പട്ടത്താനത്തെ വീട്ടിലേക്ക് ബിജെപിയും പ്രതിഷേധ മാർച്ചിന് ആഹ്വാനം ചെയ്തിട്ടുണ്ട്. ഇവർ മുകേഷ് രാജി വയ്ക്കും വരെ സമരം തുടരാനാണ് തീരുമാനം അറിയിച്ചിരിക്കുന്നത് . അതിനാൽ തന്നെ എംഎൽഎ ഓഫീസിനും വീടിനും പൊലീസ് സുരക്ഷ ശക്തമാക്കിയിട്ടുണ്ട്. ആ സാഹചര്യത്തിലാണ് മുകേഷ് കൊച്ചിയിലേക്ക് യാത്രതിരിച്ചതായി ലഭിക്കുന്ന വിവരം .