സിദ്ധരാമയ്യയും ഡി.കെ.ശിവകുമാറും ഡല്‍ഹിയില്‍ ഇന്ന് എഐസിസി നേതൃത്വവുമായി കൂടിക്കാഴ്ച നടത്തും

ബെംഗളൂരു: കര്‍ണാടക മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ.ശിവകുമാറും ഡല്‍ഹിയില്‍ ഇന്ന് എഐസിസി നേതൃത്വവുമായി കൂടിക്കാഴ്ച നടത്തും. രാത്രി ഇരുവരും ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുമായി ചര്‍ച്ച നടത്തുമെന്നാണു സൂചന. ശിവകുമാര്‍ ഇന്നലെ ഡല്‍ഹിയിലെത്തി. സിദ്ധരാമയ്യ ഇന്നു രാവിലെ ഡല്‍ഹിക്കു പോകും. മൈസൂരു ദസറയില്‍ എയര്‍ഷോ ഉള്‍പ്പെടുത്തുന്നത് സംബന്ധിച്ച് പ്രതിരോധമന്ത്രി രാജ്‌നാഥ് സിങ്ങുമായി ചര്‍ച്ച നടത്തും.

അതേസമയം, സര്‍ക്കാരുമായി ഇടഞ്ഞു നില്‍ക്കുന്ന കോണ്‍ഗ്രസ് എംഎല്‍എമാരെ അനുനയിപ്പിക്കാന്‍ എഐസിസി ജനറല്‍ സെക്രട്ടറി രണ്‍ദീപ് സിങ് സുര്‍ജേവാലയുടെ രണ്ടാംഘട്ട കൂടിക്കാഴ്ച ഇന്നു സമാപിക്കും. 3 ദിവസത്തെ ചര്‍ച്ചയില്‍ 63 എംഎല്‍എമാരെയാണ് സുര്‍ജേവാല കാണുന്നത്. ആദ്യ ഘട്ടത്തില്‍ ജൂണ്‍ 30 മുതല്‍ കഴിഞ്ഞ 2 വരെ 40 എംഎല്‍എമാരെ അദ്ദേഹം കണ്ടിരുന്നു. അടുത്ത ആഴ്ച ബാക്കിയുള്ള എംഎല്‍എമാരുമായി സുര്‍ജേവാല ചര്‍ച്ച നടത്തും.