സാമുദായിക ഐക്യം പ്രോത്സാഹിപ്പിക്കും: ഡൽഹിയിൽ മുസ്ലീം പുരോഹിതന്മാരുമായി കൂടിക്കാഴ്ച നടത്തി ആർ‌എസ്‌എസ് മേധാവി മോഹൻ ഭാഗവത്

ന്യൂഡൽഹി: സാമുദായിക ഐക്യം പ്രോത്സാഹിപ്പിക്കുന്നതിനുള്ള ശ്രദ്ധേയമായ സംരംഭങ്ങളുടെ ഭാഗമായി, രാഷ്ട്രീയ സ്വയംസേവക് സംഘ് (ആർഎസ്എസ്) മേധാവി മോഹൻ ഭാഗവത് മുസ്ലീം മതനേതാക്കളുമായും പുരോഹിതന്മാരായും കൂടിക്കാഴ്ച നടത്തി. ഡൽഹിയിലെ ഹരിയാന ഭവനിൽ നടന്ന ഈ യോഗത്തിൽ ആർഎസ്എസ് ജനറൽ സെക്രട്ടറി ദത്താത്രേയ ഹൊസബാലെ, ജോയിന്റ് ജനറൽ സെക്രട്ടറി കൃഷ്ണ ഗോപാൽ, മുതിർന്ന നേതാക്കളായ രാം ലാൽ, ഇന്ദ്രേഷ് കുമാർ എന്നിവരും പങ്കെടുത്തു. ആർഎസ്എസ് അതിന്റെ അനുബന്ധ സംഘടനയായ മുസ്ലീം രാഷ്ട്രീയ മഞ്ച് (എംആർഎം) വഴി മുസ്ലീം പുരോഹിതന്മാർ, പണ്ഡിതന്മാർ, സമൂഹത്തിലെ പ്രമുഖർ എന്നിവരുമായി നല്ല ബന്ധമാണ് സൂക്ഷിക്കുന്നത്.

2023-ൽ, ന്യൂനപക്ഷ സമൂഹവുമായി ബന്ധപ്പെടുന്നതിനും “ഒരു രാഷ്ട്രം, ഒരു പതാക, ഒരു ദേശീയഗാനം” എന്ന ആശയം പ്രോത്സാഹിപ്പിക്കുന്നതിനും ലക്ഷ്യമിട്ടുള്ള ഒരു രാജ്യവ്യാപക പ്രചാരണത്തിനുള്ള പദ്ധതികൾ എംആർഎം പ്രഖ്യാപിച്ചിരുന്നു. അതേസമയം 2022 സെപ്റ്റംബറിൽ ഇന്ത്യയിൽ മതപരമായ ഉൾപ്പെടുത്തൽ വർദ്ധിപ്പിക്കുന്നതിനുള്ള വഴികൾ ചർച്ച ചെയ്യുന്നതിനായി ഭഗവത് നിരവധി പ്രമുഖ മുസ്ലീം പുരോഹിതാരായി കൂടിക്കാഴ്ച നടത്തിയിരുന്നു. ജ്ഞാൻവാപി പള്ളി തർക്കം, ഹിജാബ് വിവാദം, ജനസംഖ്യാ നിയന്ത്രണം തുടങ്ങിയ പ്രധാന വിഷയങ്ങൾ അന്ന് കൂടിക്കാഴ്ചയിൽ ചർച്ച ചെയ്യപ്പെട്ടു എന്നാണ് റിപ്പോർട്ടുകൾ.