വീണ്ടും ഗാസയിൽ സ്‌ഫോടനം; 51 പലസ്തീന്‍കാരും 5 ഇസ്രയേല്‍ സൈനികരും കൊല്ലപ്പെട്ടു

ജറുസലം: ഗാസയിലെ വിവിധയിടങ്ങളില്‍ ഇസ്രയേല്‍ നടത്തിയ രൂക്ഷ ആക്രമണങ്ങളില്‍ 51 പലസ്തീന്‍കാര്‍ കൊല്ലപ്പെട്ടു. വടക്കന്‍ ഗാസയിലെ ബെയ്ത്ത് ഹനൂമില്‍ സ്‌ഫോടനത്തില്‍ 5 ഇസ്രയേല്‍ സൈനികരും കൊല്ലപ്പെട്ടു. 14 സൈനികര്‍ക്കു പരുക്കേറ്റു. ദോഹയില്‍ നടക്കുന്ന വെടിനിര്‍ത്തല്‍ ചര്‍ച്ചയില്‍ ഇരുപക്ഷത്തെയും 80 ശതമാനത്തോളം ഭിന്നതകള്‍ പരിഹരിച്ചെങ്കിലും അന്തിമ ധാരണയാകാന്‍ ഏതാനും ദിവസം കൂടിയെടുക്കുമെന്ന് ഇസ്രയേല്‍ അധികൃതര്‍ പറഞ്ഞു.

അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ പ്രതിനിധി സ്റ്റീവ് വിറ്റ്‌കോഫ് അടുത്തദിവസം ദോഹയിലെത്തും. വടക്കന്‍ ഗാസയില്‍ വിദൂരനിയന്ത്രിത സ്‌ഫോടകവസ്തു പൊട്ടിയാണ് 5 സൈനികര്‍ കൊല്ലപ്പെട്ടത്. സ്‌ഫോടനത്തിനുശേഷം കനത്ത വെടിവയ്പുമുണ്ടായി. രണ്ടാഴ്ച മുന്‍പു ഖാന്‍ യൂനിസില്‍ സൈനികവാഹനത്തില്‍ ഘടിപ്പിച്ച ബോംബ് പൊട്ടി 7 ഇസ്രയേല്‍ സൈനികര്‍ കൊല്ലപ്പെട്ടിരുന്നു