സമ്പാദ്യം തുടങ്ങാൻ വലിയ തുക കൈയിലുണ്ടാകണമെന്നില്ല. ചെറിയ തുക കൃത്യമായി നിക്ഷേപിക്കുകയും അത് ദീർഘകാലം തുടരുകയും ചെയ്താൽ ഭാവിയിൽ വലിയൊരു കോർപ്പസ് സൃഷ്ടിച്ചെടുക്കാൻ സാധിക്കും. ചെറിയ തുകകളെ വലിയ നിക്ഷേപമാക്കി മാറ്റാൻ സഹായിക്കുന്ന ഏറ്റവും ലളിതമായ ഒരു വഴിയാണ് മ്യൂച്വൽ ഫണ്ടുകളിലെ സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ അഥവാ എസ്ഐപി.
പ്രതിമാസം വെറും 2,000 രൂപ വീതം എസ്ഐപിയിൽ നിക്ഷേപിച്ച് ദീർഘകാലം തുടരുകയാണെങ്കിൽ ഏകദേശം 10 ലക്ഷം രൂപയുടെ സമ്പാദ്യം സൃഷ്ടിക്കാൻ കഴിയുമെന്നാണ് കണക്കുകൾ വ്യക്തമാക്കുന്നത്. പ്രതിമാസം 2,000 രൂപ എന്നത് ദിവസക്കണക്കിൽ നോക്കിയാൽ വെറും 67 രൂപ മാത്രമാണ്. ഈ തുക ഓരോ മാസവും മുടങ്ങാതെ നിക്ഷേപിക്കുമ്പോൾ കൂട്ടുപലിശയുടെ നേട്ടമാണ് നിക്ഷേപ മൂല്യം ഉയർത്തുന്നത്. 12 ശതമാനം ശരാശരി വാർഷിക റിട്ടേൺ ലഭിക്കുമെന്ന് കണക്കാക്കിയാൽ, 15 വർഷം കൊണ്ട് നിങ്ങളുടെ സമ്പാദ്യം 10 ലക്ഷം രൂപ കടക്കും.
നിക്ഷേപത്തിന്റെ കണക്കുകൾ
പ്രതിമാസ നിക്ഷേപം 2,000 (ദിവസം- 67)
ആകെ നിക്ഷേപ കാലയളവ്: 15 വർഷം (180 മാസങ്ങൾ)
നിങ്ങൾ നിക്ഷേപിക്കുന്ന ആകെ തുക: 3,60,000 (2,000 × 180)
പ്രതീക്ഷിക്കുന്ന വാർഷിക റിട്ടേൺ: 12
ലഭിക്കുന്ന ആകെ വളർച്ച/ലാഭം: 6,49,153
15 വർഷത്തിന് ശേഷമുള്ള ആകെ കോർപ്പസ്: 10,09,153
മ്യൂച്വൽ ഫണ്ട് നിക്ഷേപങ്ങളിലെ ഏറ്റവും വലിയ പ്രത്യേകത കോമ്പൗണ്ടിങ് ആണ്. നിങ്ങളുടെ നിക്ഷേപത്തിന് ലഭിക്കുന്ന വരുമാനം വീണ്ടും നിക്ഷേപത്തിന്റെ ഭാഗമാകുകയും, അതിനും തുടർന്ന് വരുമാനം ലഭിക്കുകയും ചെയ്യുന്നു. നിക്ഷേപം എത്ര നേരത്തെ ആരംഭിക്കുന്നുവോ അത്രയും കൂടുതൽ നേട്ടം കോമ്പൗണ്ടിങ് വഴി ലഭിക്കും. തുടക്കത്തിൽ 2,000 രൂപ വെച്ച് ആരംഭിക്കുന്നവർക്ക് വരുമാനം വർധിക്കുന്നതിനനുസരിച്ച് പ്രതിവർഷം നിക്ഷേപ തുക 10 ശതമാനം അല്ലെങ്കിൽ ഒരു നിശ്ചിത തുക വീതം ഉയർത്തുന്ന ടോപ്പ്-അപ്പ് എസ്ഐപി രീതിയും സ്വീകരിക്കാവുന്നതാണ്. ഇത് ലക്ഷ്യത്തിലെത്താനുള്ള സമയം ഗണ്യമായി കുറയ്ക്കും.