പൊന്നാനിയിൽ ബൈക്ക് യാത്രികനെ സഹായിക്കാൻ ഓടിയെത്തിയത് ഒരു കൊച്ചു കുട്ടി

മലപ്പുറം: ബൈക്കിൽ കാറിടിച്ച് റോഡിലേക്ക് തെറിച്ചുവീണ യാത്രക്കാരൻ രക്ഷപെട്ടത് അത്ഭുതകരമായി. മലപ്പുറം പൊന്നാനിയിലാണ് അപകടം നടന്നത്. ബൈക്ക് യാത്രികൻ തെറിച്ച് റോഡിലേക്ക് വീഴുന്ന ദൃശ്യങ്ങൾ പുറത്ത്. രണ്ട് ദിവസം മുമ്പ് സൈഡ് റോഡിൽ നിന്ന് എത്തിയ ബൈക്കിലാണ് കാർ ഇടിച്ചത്. അപകടത്തിന്റെ പേടിപ്പെടുത്തുന്ന ദൃശ്യങ്ങൾക്കൊപ്പം കൗതുകകരമായ ഒരു കാര്യം ചെറിയ ഒരു കുട്ടിയുടെ വലിയ മനസ്സാണ്.

മറ്റൊരു ബൈക്കിലെത്തിയ യാത്രികരിലെ ചെറിയ ഒരു കുട്ടിയാണ് റോ‍ഡിൽ വീണ യാത്രക്കാരനെ സഹായിക്കാൻ ആദ്യം ഓടിയെത്തുന്നത്. പരിക്കേറ്റ ആളെ എഴുന്നേൽക്കാൻ സഹായിക്കുന്നത് ദൃശ്യങ്ങളിൽ വ്യക്തമാണ്. നിരവധി പേരാണ് കുട്ടിയുടെ വലിയ മനസിനെ അഭിനന്ദിച്ചു കൊണ്ട് സമൂഹമാധ്യമങ്ങളിൽ പ്രതികരിക്കുന്നത്. ഏറ്റവും ആശ്വാസകരമായ കാര്യം ഹെൽമറ്റ് ധരിച്ചിരിക്കുന്നതിനാൽ അപകടത്തിൽപെട്ട ബൈക്ക് യാത്രക്കാരന് കാര്യമായ പരിക്കൊന്നും സംഭവിച്ചിട്ടില്ല.