പുതിയ ഗാലക്‌സി എസ്26 അൾട്രയില്‍ സാംസങ് വേറിട്ട സെന്‍സര്‍ ഉപയോഗിക്കും: റിപ്പോർട്ട് പുറത്ത്

പുതിയ ഗാലക്‌സി എസ്26 അൾട്രയില്‍ സാംസങ് വേറിട്ട സെന്‍സര്‍ ഉപയോഗിക്കുമെന്ന റിപ്പോർട്ടുകളാണ് പുറത്തുവരുന്നത്. മുൻ അൾട്ര മോഡലുകളിൽ ഉപയോഗിച്ചിരുന്ന സ്വന്തം ഐസോസെൽ സെൻസറുകൾക്ക് പകരം, 200 മെഗാപിക്സൽ സോണി സെൻസർ സാംസങ് ഉപയോഗിച്ചേക്കും എന്നാണ് റിപ്പോർട്ട്.

സോണി സെൻസർ വെറുമൊരു ക്യാമറ ഘടകം മാത്രമല്ലെന്നും 1/1.1-ഇഞ്ച് സെൻസർ വലുപ്പമുള്ള 200-മെഗാപിക്സൽ പവർ ഹൗസാണെന്നാണ് റിപ്പോർട്ടുകൾ സൂചിപ്പിക്കുന്നത്. സാംസങ്ങിന്‍റെ ഗാലക്‌സി എസ്25 അൾട്രയിൽ നിലവിൽ ഉപയോഗിക്കുന്ന 1/1.3-ഇഞ്ച് സെൻസറിൽ നിന്ന് ഇത് വലിയ അപ്‌ഗ്രേഡാണ്.

ഫോണുകളുടെ സെൻസർ മേഖലയിൽ, ഏകദേശം 1 ഇഞ്ച് സെൻസർ നേടുന്നത് അപൂർവ്വമാണ്. നിലവിൽ ഷവോമി, വിവോ പോലുള്ള ബ്രാൻഡുകളുടെ പ്രീമിയം ഡിവൈസുകൾക്ക് മാത്രമേ ഇത് ലഭിക്കൂ. സാധാരണയായി അവ 50 മെഗാപിക്സലിൽ കൂടാറില്ല. സോണിയുടെ നൂതന സെൻസർ സാങ്കേതികവിദ്യയുടെ സംയോജനം, സാംസങ്ങിന് അതിന്‍റെ ഇമേജ് ഗുണനിലവാര കഴിവുകൾ നിലവിലെ പരിധിക്കപ്പുറം വികസിപ്പിക്കാനുള്ള അവസരം നൽകും.

പ്രൊഫഷണൽ-ഗ്രേഡ് ഫോട്ടോഗ്രാഫിക്ക് മാത്രമല്ല, മികച്ച ഫോട്ടോ നിലവാരം തേടുന്ന ദൈനംദിന ഉപയോക്താക്കൾക്കും ഈ മെച്ചപ്പെടുത്തലുകൾ നിർണായകമാണ്. കൂടാതെ, വലിയ സെൻസർ പിടിച്ചെടുക്കുന്ന വർധിച്ച ഡാറ്റ എഐ നിയന്ത്രിത ഇമേജ് പ്രോസസിംഗ് വഴി കൂടുതൽ മെച്ചപ്പെടുത്താനും കഴിയും. അങ്ങനെ വെല്ലുവിളി നിറഞ്ഞ ലൈറ്റിംഗ് സാഹചര്യങ്ങളിൽ നല്ല ചിത്രങ്ങൾ എടുക്കാൻ സാധിക്കും.