‘മഞ്ഞുമ്മൽ ബോയ്സ്’ എന്ന ഇൻഡസ്ട്രി ഹിറ്റിന് ശേഷം സംവിധായകൻ ചിദംബരം ഒരുക്കിയ ‘ബാലൻ’ തിയേറ്ററുകളിൽ വൻ പ്രേക്ഷകപ്രീതി നേടി മുന്നേറുകയാണ്. ഒരുപിടി പുതുമുഖങ്ങളെ അണിനിരത്തി ചിദംബരം ഒരുക്കിയ ഈ ചിത്രത്തിന്റെ മേക്കിങ്ങിനും താരങ്ങളുടെ പ്രകടനത്തിനും വലിയ കയ്യടികളാണ് ലഭിക്കുന്നത്. ചിത്രം ബോക്സ് ഓഫീസിൽ കുതിക്കുമ്പോൾ, അതിനൊപ്പം തന്നെ സിനിമാ ലോകത്തിന്റെ അഭിനന്ദനങ്ങൾ വാരിക്കൂട്ടുകയാണ് ചിത്രത്തിന്റെ കാസ്റ്റിംഗ് ഡയറക്ടർ ഗണപതി.
സിനിമയിലെ കഥാപാത്രങ്ങൾക്ക് അനുയോജ്യരായ പ്രതിഭകളെ കൃത്യമായി കണ്ടെത്തി എത്തിച്ചതാണ് ചിത്രത്തിന്റെ പ്രധാന വിജയഘടകമെന്നാണ് പ്രേക്ഷക വിലയിരുത്തൽ. ചിത്രത്തിൽ പ്രധാന വേഷങ്ങളിലെത്തിയ നടി ഫർസാന പാലത്തിങ്കൽ, ബാലനായി വേഷമിട്ട ആദിശേഷൻ, സിനാൻ എന്നിവരുടെ പ്രകടനങ്ങളാണ് പ്രധാനമായും എല്ലാവരും എടുത്തുപറയുന്നത്. ഇവരെ കണ്ടെത്താനായി കാസ്റ്റിംഗ് ടീം നടത്തിയ കഠിനാധ്വാനം ചെറുതല്ല. പ്രധാന കഥാപാത്രമായ ‘ബാലനെ’ അവതരിപ്പിച്ച ആദിശേഷനെ കണ്ടെത്തുന്നതിനായി കേരളത്തിലെ 40 മുതൽ 50 വരെ സ്കൂളുകളിലാണ് ഓഡിഷൻ നടത്തിയത്. ഫർസാന അവതരിപ്പിച്ച അമ്മ വേഷത്തിനായി ഏകദേശം 4000-ത്തോളം പേരെയാണ് ഓഡിഷൻ ചെയ്തതെന്ന് ഗണപതി നേരത്തെ ഒരു അഭിമുഖത്തിൽ വ്യക്തമാക്കിയിരുന്നു.
ചിദംബരത്തിന്റെ മുൻ ചിത്രമായ ‘മഞ്ഞുമ്മൽ ബോയ്സി’ന്റെയും കാസ്റ്റിംഗ് ഡയറക്ടർ ഗണപതി തന്നെയായിരുന്നു. ‘രോമാഞ്ചം’, ‘ആവേശം’ എന്നീ വമ്പൻ ഹിറ്റുകളൊരുക്കിയ സംവിധായകൻ ജിത്തു മാധവനാണ് ഈ ചിത്രത്തിന്റെ രചന നിർവ്വഹിച്ചിരിക്കുന്നത്. ബേസിൽ ജോസഫ്, ആസിഫ് അലി ഉൾപ്പെടെയുള്ള പ്രമുഖ താരങ്ങൾ ചിത്രത്തെയും അണിയറ പ്രവർത്തകരെയും അഭിനന്ദിച്ച് രംഗത്തെത്തിയിട്ടുണ്ട്. ചിത്രം ഒരു ‘ക്ലാസിക് മാസ്റ്റർപീസ്’ ആണെന്ന് റാപ്പർ വേടൻ പ്രതികരിച്ചപ്പോൾ ഗൗരി കിഷൻ, നീരജ് മാധവ്, പ്രകാശ് വർമ്മ, സൗബിൻ ഷാഹിർ, അന്ന ബെൻ തുടങ്ങിയ നിരവധി താരങ്ങളും ചിത്രത്തിന് പിന്തുണയുമായി എത്തി. തമിഴിൽ വിജയ്യുടെ ‘ജനനായകൻ’, കന്നഡയിൽ യാഷിന്റെ ‘ടോക്സിക്’ എന്നീ വമ്പൻ ചിത്രങ്ങൾ നിർമ്മിക്കുന്ന പ്രശസ്ത ബാനറായ കെ.വി.എൻ പ്രൊഡക്ഷൻസ് മലയാളത്തിൽ നിർമ്മിക്കുന്ന ആദ്യ ചിത്രം കൂടിയാണ് ‘ബാലൻ’.