മുംബൈയിൽ നടന്ന ‘സ്വദേശ്’ പ്രസ്ഥാനത്തിന്റെ ഒന്നാം വാർഷികാഘോഷത്തിൽ, പ്രമുഖ വ്യവസായി കുടുംബാംഗമായ രാധിക മർച്ചന്റിന്റെ ഫാഷൻ ലുക്ക് ഏറെ ശ്രദ്ധിക്കപ്പെട്ടു. സദസ്സിനെ ഒന്നാകെ വിസ്മയിപ്പിച്ച അവരുടെ കോർസെറ്റ്-പാവാട വസ്ത്രധാരണത്തിന്റെ ചിത്രങ്ങൾ സമൂഹമാധ്യമങ്ങളിൽ വൈറലായിക്കഴിഞ്ഞു. പരമ്പരാഗത ഇന്ത്യൻ തുണിത്തര കലയെയും സമകാലിക പാശ്ചാത്യ കോച്ചർ ഡിസൈനുകളെയും കോർത്തിണക്കിയാണ് മയൂർ ഗിരോത്ര സ്വദേശുമായി സഹകരിച്ച് ഈ വസ്ത്രം ഒരുക്കിയിരിക്കുന്നത്.
സ്ട്രാപ്പ്‌ലെസ് കോർസെറ്റ്, കൈകൊണ്ട് വരച്ച കലംകാരി ഡിസൈനുകളുള്ള പാവാട, ഒഴുകിക്കിടക്കുന്ന ദുപ്പട്ട എന്നിവയടങ്ങുന്നതാണ് ഈ വസ്ത്രം. സ്വർണ്ണ, തവിട്ടു നിറങ്ങൾക്കൊപ്പം പിങ്ക്, നീല നിറങ്ങളുടെ സ്പർശവും മെറ്റാലിക് എംബ്രോയ്ഡറിയും വസ്ത്രത്തിന്റെ അഴക് കൂട്ടുന്നു. ആന്ധ്രാപ്രദേശിലെ ശ്രീ കാളഹസ്തി പാരമ്പര്യത്തിൽ നിന്നും കൃഷ്ണലീല, കൽപ്പവൃക്ഷം എന്നിവയിൽ നിന്നും പ്രചോദനം ഉൾക്കൊണ്ടാണ് ഈ പെയിന്റിംഗുകൾ തയ്യാറാക്കിയിരിക്കുന്നത്. ഭക്തിസാന്ദ്രമായ ചിത്രങ്ങളും മയിലുകൾ, പശുക്കൾ, താമരപ്പൂക്കൾ, പുഷ്പവള്ളികൾ തുടങ്ങിയ പ്രകൃതിദത്ത ഘടകങ്ങളും ഇതിൽ സമന്വയിപ്പിച്ചിരിക്കുന്നു.
വെറുമൊരു ഉപരിതല അലങ്കാരത്തിനപ്പുറം ഇന്ത്യൻ കലയുടെയും പുരാണങ്ങളുടെയും കഥ പറയുന്ന ആഖ്യാനമായി ഈ മോട്ടിഫുകൾ മാറുന്നു. സർത്തോസി, പിത്ത, ഡബ്ക, ആപ്ലിക് എന്നീ പരമ്പരാഗത എംബ്രോയ്ഡറി സാങ്കേതിക വിദ്യകൾ ഉപയോഗിച്ചാണ് സ്വദേശിലെ കരകൗശല വിദഗ്ധർ ഇതിലെ പെയിന്റിംഗുകളെ അതിമനോഹരമായി ഫ്രെയിം ചെയ്തിരിക്കുന്നത്. ലോഹ അലങ്കാരങ്ങൾ കലാസൃഷ്ടിയുടെ ഭംഗി മറയ്ക്കാതെ കൂടുതൽ ആഴവും ഗാംഭീര്യവും നൽകാൻ സഹായിക്കുന്നു.
സമ്പന്നമായ പൈതൃകത്തിന്റെയും ആധുനിക ഫാഷന്റെയും അപൂർവ്വ സംഗമമാണ് രാധിക അംബാനിയുടെ ഈ ലുക്ക് നൽകുന്നത്. റോയൽ ലുക്കുള്ള പാവാടയോടൊപ്പം മോഡേൺ കോർസെറ്റും മൃദുവായ ദുപ്പട്ടയും ചേരുമ്പോൾ പാരമ്പര്യ കലയായ കലംകാരിയെ അന്താരാഷ്ട്ര ഹൈ-ഫാഷൻ നിലവാരത്തിലേക്ക് ഉയർത്താൻ സാധിച്ചു. രാജ്യത്തെ പരമ്പരാഗത കരകൗശല വിദഗ്ധരുടെ കഴിവിനും പൈതൃകത്തിനും ആദരവ് അർപ്പിക്കുന്നതാണ് അംബാനി കുടുംബത്തിന്റെ ഈ ഫാഷൻ പരേഡ്.