ഒറ്റത്തവണ ഉപയോഗിക്കുന്ന പ്ലാസ്റ്റിക്കുകളുടെ നിരോധനം: ഉത്തരവ് സ്റ്റേ ചെയ്ത് സുപ്രീം കോടതി

ഡൽഹി: കേരളത്തിൽ ഒറ്റത്തവണ ഉപയോഗിക്കുന്ന പ്ലാസ്റ്റിക്കുകളുടെ (എസ്‌യുപി) ഉപയോഗവും വിൽപ്പനയും നിരോധിച്ച കേരള ഹൈക്കോടതി ഉത്തരവ് സുപ്രീം കോടതി തിങ്കളാഴ്ച സ്റ്റേ ചെയ്തു. മലയോര വിനോദസഞ്ചാര മേഖലകളിലും സർക്കാർ പരിപാടികളിലും വിവാഹ ചടങ്ങുകളിലുമടക്കം പ്ലാസ്റ്റിക് നിരോധനം ഏർപ്പെടുത്തിയ കേരള ഹൈക്കോടതി വിധിയാണ് സുപ്രീംകോടതി സ്റ്റേ ചെയ്‌തത്. ഹൈക്കോടതിയുടെ പ്രത്യേക ബെഞ്ചിന് അതിനുള്ള അധികാരമുണ്ടോയെന്ന് സുപ്രീം കോടതി സംശയവുമുന്നയിച്ചു. പരിസ്ഥിതി സംരക്ഷണം ചൂണ്ടിക്കാട്ടി സ്വമേധയാ എടുത്ത കേസിലായിരുന്നു ഹൈക്കോടതി ഉത്തരവ്.