ഇലക്ട്രോണിക് സ്‌പോർട്‌സ് വേൾഡ് കപ്പിന്‍റെ ആഗോള അംബാസഡറായി ക്രിസ്റ്റ്യാനോ റൊണാൾഡോ

ഇലക്ട്രോണിക് സ്‌പോർട്‌സ് വേൾഡ് കപ്പിന്‍റെ ആഗോള അംബാസഡറായി ലോക ഫുട്‌ബോൾ താരവും അൽ നസ്ർ ക്ലബ് ക്യാപ്റ്റനുമായ ക്രിസ്റ്റ്യാനോ റൊണാൾഡോയെ തെരഞ്ഞെടുത്തതായി ഇ-സ്‌പോർട്‌സ് വേൾഡ് കപ്പ് ഫൗണ്ടേഷൻ അറിയിച്ചു. ജൂലൈ ഏഴ് മുതൽ ആഗസ്റ്റ് 24 വരെ റിയാദിലാണ് ഇ-സ്പോർട്സ് വേൾഡ് കപ്പ് ടൂർണമെന്‍റ് നടക്കുക.

റൊണാൾഡോയുടെ വരവ് ടൂർണമെൻറിന് വലിയ ഉത്തേജനമാണെന്നും ഇ-സ്പോർട്സ് ചരിത്രത്തിലെ ഏറ്റവും വലിയ ടൂർണമെൻറായിരിക്കുമെന്നും ഫൗണ്ടേഷൻ പറഞ്ഞു. ‘മുകളിലേക്ക് ഉയരുക’ശീർഷകത്തിലാണ് മത്സരം നടക്കുക. ഔദ്യോഗിക അംബാസഡർ എന്ന നിലയിൽ റൊണാൾഡോ ടൂർണമെൻറിന്‍റെ ആഗോള മാധ്യമ പ്രചാരണത്തിന് നേതൃത്വം നൽകുകയും റിയാദിലെ ബൊളിവാഡ് സിറ്റിയിൽ നടക്കുന്ന നിരവധി പരിപാടികളിൽ പങ്കെടുക്കുകയും ചെയ്യും.