ഇന്ത്യക്കെതിരെ കടുത്ത വ്യാപാര നടപടികളുമായി ട്രമ്പ്: ഓഗസ്റ്റ് 1 മുതൽ 25% അധിക താരിഫ്!

അമേരിക്കൻ പ്രസിഡന്റ് ഡോണൾഡ് ട്രംപ് ഇന്ത്യക്കെതിരെ കടുത്ത വ്യാപാര നടപടികളുമായി രംഗത്ത്. 2025 ഓഗസ്റ്റ് 1 മുതൽ ഇന്ത്യൻ ഉൽപ്പന്നങ്ങൾക്ക് 25 ശതമാനം അധിക താരിഫ് ഏർപ്പെടുത്തുമെന്ന് ട്രംപ് പ്രഖ്യാപിച്ചു. ‘ഇന്ത്യ നമ്മുടെ സുഹൃത്താണെങ്കിലും, അവരുടെ താരിഫുകൾ വളരെ ഉയർന്നതാണ്, ലോകത്തിലെ ഏറ്റവും ഉയർന്ന താരിഫുകളിൽ ഒന്നാണിത്’- ഒരു സോഷ്യൽ മീഡിയ പോസ്റ്റിൽ ട്രംപ് കുറിച്ചു.

ഇന്ത്യയെ “സുഹൃത്ത്” എന്ന് വിശേഷിപ്പിക്കുമ്പോഴും, ഉയർന്ന താരിഫുകൾ കാരണം അമേരിക്ക ആ രാജ്യവുമായി താരതമ്യേന “ചെറിയ ഇടപാടുകൾ” മാത്രമേ നടത്തിയിട്ടുള്ളൂ എന്ന് ട്രംപ് പറഞ്ഞു. ഓഗസ്റ്റ് 1 മുതൽ ഇന്ത്യ 25 ശതമാനവും പിഴയും അടയ്ക്കേണ്ടി വരുമെന്നും അദ്ദേഹം കൂട്ടിച്ചേർത്തു. റഷ്യയിൽ നിന്ന് സൈനിക ഉപകരണങ്ങളും ഊർജ്ജവും ഇന്ത്യ വാങ്ങുന്നതിനെയും ട്രംപ് വിമർശിച്ചു. യുക്രെയ്നിലെ യുദ്ധം നടക്കുന്ന സാഹചര്യത്തിൽ റഷ്യയെ ഒറ്റപ്പെടുത്താൻ ലോകം ശ്രമിക്കുമ്പോൾ ഇന്ത്യയുടെ ഈ നിലപാട് “ഒട്ടും നല്ലതല്ല” എന്നാണ് ട്രംപിന്റെ പക്ഷം.

അതേസമയം, ട്രംപിന്റെ ഈ പ്രഖ്യാപനം, ഇന്ത്യയും അമേരിക്കയും തമ്മിൽ നിലവിലുള്ള വ്യാപാര ചർച്ചകളെ കൂടുതൽ സങ്കീർണ്ണമാക്കും. ഓഗസ്റ്റ് 1-ന് മുൻപ് ഒരു വ്യാപാര കരാറിൽ എത്തുന്നത് സംബന്ധിച്ച് ദിവസങ്ങളായി ചർച്ചകൾ നടക്കുന്നുണ്ടായിരുന്നു. എന്നാൽ, ഈ സമയപരിധിക്കുള്ളിൽ ഒരു കരാർ അസാധ്യമാണെന്ന് അമേരിക്കൻ വ്യാപാര പ്രതിനിധി ജാമിസൺ ഗ്രിയർ സൂചിപ്പിച്ചിരുന്നു. കൂടുതൽ ചർച്ചകൾ ആവശ്യമാണെന്നും ഒരു അമേരിക്കൻ സംഘം ഓഗസ്റ്റ് പകുതിയോടെ ഇന്ത്യ സന്ദർശിക്കുമെന്നും റിപ്പോർട്ടുകളുണ്ട്.

ഇന്ത്യ, തങ്ങളുടെ കാർഷിക, ക്ഷീര മേഖലകളിൽ താരിഫ് കുറയ്ക്കാൻ വിസമ്മതിക്കുന്നത് ചർച്ചകളിൽ പ്രധാന തർക്ക വിഷയമാണ്. ഈ മേഖലകൾ ഇന്ത്യയെ സംബന്ധിച്ചിടത്തോളം സാമ്പത്തികമായും രാഷ്ട്രീയമായും വളരെ പ്രധാനപ്പെട്ടതാണ്. വാഹനങ്ങൾ, വൈദ്യോപകരണങ്ങൾ, തുണിത്തരങ്ങൾ, രത്നങ്ങൾ, ആഭരണങ്ങൾ എന്നിവയുൾപ്പെടെയുള്ള ഇന്ത്യൻ ഉൽപ്പന്നങ്ങൾക്ക് ഉയർന്ന താരിഫ് ഏർപ്പെടുത്താൻ അമേരിക്ക തയ്യാറാണെന്ന് റോയിട്ടേഴ്സ് റിപ്പോർട്ട് ചെയ്തിരുന്നു.

അതേസമയം, അമേരിക്കൻ ഉൽപ്പന്നങ്ങളായ വ്യാവസായിക ഉൽപ്പന്നങ്ങൾ, ഇലക്ട്രിക് വാഹനങ്ങൾ, വൈനുകൾ, പെട്രോകെമിക്കൽ ഉൽപ്പന്നങ്ങൾ, കാർഷിക, ക്ഷീര ഉൽപ്പന്നങ്ങൾ എന്നിവയ്ക്ക് താരിഫ് കുറയ്ക്കാനാണ് ഇന്ത്യയോട് അമേരിക്ക ആവശ്യപ്പെടുന്നത്. ചില വിദഗ്ധർ ഇത് ഒരു താത്കാലിക നടപടിയായിരിക്കാമെന്നും, വരും ആഴ്ചകളിൽ ഒരു ഇടക്കാല കരാറിലേക്ക് എത്താൻ സാധ്യതയുണ്ടെന്നും വിലയിരുത്തുന്നു. എന്നാൽ, ഈ നീക്കം ഇന്ത്യയുടെ കയറ്റുമതി മേഖലയ്ക്ക്, പ്രത്യേകിച്ച് ഫാർമസ്യൂട്ടിക്കൽസ്, ഓട്ടോമൊബൈൽസ്, ടെക്സ്റ്റൈൽസ് തുടങ്ങിയ മേഖലകളിൽ വലിയ ആഘാതം സൃഷ്ടിക്കുമെന്ന് പ്രതീക്ഷിക്കുന്നു. ട്രംപിന്റെ ഈ നടപടിയിൽ ഇന്ത്യയുടെ പ്രതികരണം എന്തായിരിക്കുമെന്നാണ് ഇനി കണ്ടറിയേണ്ടത്.