അൽഖയ്ദ ബന്ധമുള്ള ഭീകരസംഘടനയുടെ നേതാവായ യുവതി അറസ്റ്റിൽ

ബെംഗളൂരു: അൽഖ്വയ്ദയുമായി ബന്ധമുള്ള ഭീകരസംഘടനയുടെ നേതാവായ യുവതി അറസ്റ്റിലായി. ഝാർഖണ്ഡ് സ്വദേശിനി ഷമാ പർവീണിനെയാണ് ഗുജറാത്ത് ഭീകര വിരുദ്ധ സ്‌ക്വാഡ് (എടിഎസ്) അറസ്റ്റ് ചെയ്തത്. മുപ്പതുകാരിയായ ഷമയെ ബെം​ഗളുരുവിൽ നിന്നാണ് എടിഎസ് പിടികൂടിയത്. അൽഖ്വയ്ദ ഇൻ ദ ഇന്ത്യൻ സബ്‌കോണ്ടിനെന്റു(എക്യുഐഎസ്)മായി ബന്ധമുള്ള ഭീകരസംഘടനയ്ക്ക് നേതൃത്വം നൽകിയിരുന്നത് ഷമയെന്നാണ് റിപ്പോർട്ട്.

ഭീകരസംഘത്തിന് നേതൃത്വം നൽകിയിരുന്നത് ഷമ ആയിരുന്നെന്ന് എടിഎസിനെ ഉദ്ധരിച്ച് ദേശീയമാധ്യമങ്ങൾ റിപ്പോർട്ട് ചെയ്തു. കർണാടകയിൽ ഭീകരപ്രവർത്തനങ്ങൾ ഏകോപിപ്പിച്ചിരുന്നത് ഇവരായിരുന്നെന്നും റിപ്പോർട്ടിൽ പറയുന്നു. കഴിഞ്ഞയാഴ്ച ​ഗുജറാത്ത് എടിഎസ് അറസ്റ്റ് ചെയ്ത അൽ ഖ്വയ്ദ ഭീകരവാദികളിൽനിന്ന് ലഭിച്ച വിവരത്തിന്റെ അടിസ്ഥാനത്തിലാണ് ഷമ പിടിയിലായത്.

ജൂലൈ 23-ാം തീയതി ഗുജറാത്ത്, ഡൽഹി, നോയ്ഡ എന്നിവിടങ്ങളിൽനിന്ന് നാല് ഭീകരവാദികളെ ഗുജറാത്ത് എടിഎസ് അറസ്റ്റ് ചെയ്തിരുന്നു. മുഹമ്മദ് ഫർദീൻ, സെയ്ഫുള്ള ഖുറേഷി, സീഷാൻ അലി, മുമ്മഹദ് ഫൈഖ് എന്നിവരായിരുന്നു പിടിയിലായത്.