അട്ടപ്പാടി മധു വധക്കേസിൽ മൂന്ന് പ്രതികളെ വെറുതെ വിട്ട വിധി ചോദ്യം ചെയ്ത് സുപ്രീം കോടതിയെ സമീപിക്കാൻ മധുവിന്റെ കുടുംബം തീരുമാനിച്ചു. മുഴുവൻ പ്രതികൾക്കും അർഹമായ ശിക്ഷ ലഭിക്കുന്നത് വരെ നിയമപോരാട്ടം തുടരുമെന്നും, ഇതിനായി സർക്കാർ നിയമസഹായം ലഭ്യമാക്കുമെന്നാണ് പ്രതീക്ഷയെന്നും മധുവിന്റെ സഹോദരി സരസു വ്യക്തമാക്കി. നിയമസഹായം അഭ്യർത്ഥിച്ചുകൊണ്ട് അടുത്താഴ്ച മുഖ്യമന്ത്രിയെ നേരിൽ കാണാനും കുടുംബം തീരുമാനിച്ചിട്ടുണ്ട്.
അപ്പീൽ നടപടികളുമായി മുന്നോട്ട് പോകാതിരിക്കാൻ വലിയ സമ്മർദ്ദങ്ങൾ ഉണ്ടായിരുന്നുവെന്നും, ഇപ്പോഴും ഭയത്തോടെയാണ് കഴിയുന്നതെന്നും സരസു പറഞ്ഞു. മധു അനുഭവിച്ച ദുരിതങ്ങൾ മറ്റാർക്കും സംഭവിക്കരുത് എന്ന ഉറച്ച തീരുമാനത്തോടെയാണ് തങ്ങൾ നീതിക്കായി പൊരുതുന്നത്. നേരത്തെ, വിചാരണക്കോടതി വെറുതെ വിട്ട ഒന്നാം പ്രതി ഹുസൈൻ, നാലാം പ്രതി അനീഷ്, പതിനൊന്നാം പ്രതി അബ്ദുൾ ലത്തീഫ് എന്നിവരെ ഒഴിവാക്കിയ വിധിക്കെതിരെയാണ് കുടുംബം ഇപ്പോൾ സുപ്രീം കോടതിയിൽ അപ്പീൽ നൽകാൻ ഒരുങ്ങുന്നത്. അതേസമയം, കേസിൽ പ്രതികളായിരുന്ന മറ്റ് 12 പേർക്ക് ജീവപര്യന്തം തടവ് ശിക്ഷ ലഭിച്ചിരുന്നു.