നിയമസഭാ തെരഞ്ഞെടുപ്പ് നിയന്ത്രിച്ച രത്തൻ യു. കേൽക്കറെ മുഖ്യമന്ത്രി വി.ഡി. സതീശന്റെ സെക്രട്ടറിയായി നിയമിച്ച നടപടി തെരഞ്ഞെടുപ്പിന്റെ വിശ്വാസ്യതയെത്തന്നെ ചോദ്യം ചെയ്യുന്നതാണെന്ന് സിപിഐഎം സംസ്ഥാന സെക്രട്ടറിയേറ്റ് പ്രസ്താവനയിൽ വ്യക്തമാക്കി. തെരഞ്ഞെടുപ്പിന് തൊട്ടുപിന്നാലെ ഇത്തരം ഒരു നിയമനം നടത്തിയത് ‘ഉദ്ദിഷ്ട കാര്യത്തിന് ഉപകാരസ്മരണ’ എന്നതുപോലെയാണെന്നും, കേരളത്തിൽ ഇങ്ങനെയൊരു അനുഭവം മുൻപ് ഉണ്ടായിട്ടില്ലെന്നും പാർട്ടി ചൂണ്ടിക്കാട്ടി. തെരഞ്ഞെടുപ്പ് വേളയിൽ കമ്മീഷൻ യുഡിഎഫിന് അനുകൂലമായി പക്ഷപാതപരമായ നിലപാടാണ് സ്വീകരിച്ചതെന്ന എൽഡിഎഫ് ആരോപണം ഈ നിയമനത്തോടെ ശരിവെക്കപ്പെട്ടിരിക്കുകയാണ്.
പശ്ചിമ ബംഗാളിലെ സമാനമായ നിയമനങ്ങളെ നേരത്തെ രൂക്ഷമായി വിമർശിച്ച കോൺഗ്രസ് നേതൃത്വത്തിന്റെ ഇരട്ടത്താപ്പാണ് ഇപ്പോൾ കേരളത്തിൽ കാണുന്നതെന്ന് സിപിഐഎം കുറ്റപ്പെടുത്തി. ബിജെപിയും തെരഞ്ഞെടുപ്പ് കമ്മീഷനും തമ്മിലുള്ള ഒത്തുകളിക്കെതിരെ രാഹുൽ ഗാന്ധി മുൻപ് നടത്തിയ വിമർശനങ്ങൾ ഉദ്ധരിച്ചുകൊണ്ട്, കേരളത്തിൽ കോൺഗ്രസും ബിജെപിയും കമ്മീഷനും ചേർന്ന് നടത്തിയ ഒത്തുകളിയെക്കുറിച്ച് രാഹുൽ ഗാന്ധിയും എഐസിസിയും മറുപടി പറയണമെന്ന് പാർട്ടി ആവശ്യപ്പെട്ടു. തെരഞ്ഞെടുപ്പ് ചുമതലയിലുള്ള ഉദ്യോഗസ്ഥർക്ക് വിജയിച്ച സർക്കാരിന് കീഴിൽ ഉന്നത പദവി നൽകുന്നതിനെതിരെ ദേശീയ തലത്തിൽ കോൺഗ്രസ് ഉയർത്തിയ ‘കൂൾ ഓഫ്’ ആവശ്യങ്ങൾ ഇപ്പോൾ അവർ തന്നെ ലംഘിക്കുകയാണെന്ന് സിപിഐഎം ആരോപിച്ചു.
തെരഞ്ഞെടുപ്പ് കാലത്ത് നടന്ന നിരവധി അട്ടിമറികൾ സിപിഐഎം പ്രസ്താവനയിൽ എടുത്തുപറയുന്നുണ്ട്. എസ്ഐആറിന്റെ പേരിൽ ദശലക്ഷക്കണക്കിന് യഥാർത്ഥ വോട്ടർമാരുടെ പേരുകൾ പട്ടികയിൽ നിന്ന് നീക്കം ചെയ്തതും, പല മണ്ഡലങ്ങളിലും എൽഡിഎഫ് സ്ഥാനാർത്ഥികളുടെ ചിഹ്നം വ്യക്തമല്ലാത്ത രീതിയിൽ പ്രിന്റ് ചെയ്തതും വലിയ വിവാദമായിരുന്നു. തെരഞ്ഞെടുപ്പ് കമ്മീഷന്റെ കത്തിൽ ബിജെപി സീൽ പതിപ്പിച്ചത് ഉൾപ്പെടെയുള്ള നടപടികൾ കമ്മീഷന്റെ നിഷ്പക്ഷതയെയാണ് ചോദ്യം ചെയ്യുന്നത്. കൂടാതെ, തെരഞ്ഞെടുപ്പ് കഴിഞ്ഞ് ആഴ്ചകൾ പിന്നിട്ടിട്ടും കൃത്യമായ വോട്ടിംഗ് ശതമാനം പുറത്തുവിടാൻ കമ്മീഷൻ തയ്യാറായില്ലെന്നും, സ്ട്രോങ് റൂമുകൾ തുറന്നെന്ന ആരോപണങ്ങൾ ഗൗരവകരമാണെന്നും പാർട്ടി വിലയിരുത്തുന്നു.
കേന്ദ്രത്തിൽ ബിജെപി സർക്കാർ തെരഞ്ഞെടുപ്പ് കമ്മീഷന്റെ നിഷ്പക്ഷത അട്ടിമറിക്കാൻ ശ്രമിക്കുമ്പോൾ, കേരളത്തിൽ കോൺഗ്രസ് നേതൃത്വത്തിലുള്ള സർക്കാരും സമാനമായ രീതിയിൽ ഇടപെടുകയാണെന്ന് സിപിഐഎം ചൂണ്ടിക്കാട്ടി. രാഷ്ട്രീയ നേതൃത്വത്തിന്റെ താല്പര്യങ്ങൾക്ക് വഴങ്ങി തീരുമാനങ്ങൾ എടുക്കുന്ന സംവിധാനമായി തെരഞ്ഞെടുപ്പ് കമ്മീഷനുകൾ മാറുന്നത് ജനാധിപത്യത്തിന് വലിയ ഭീഷണിയാണ്. ജനാധിപത്യ പ്രക്രിയയുടെ വിശ്വാസ്യത തകർക്കുന്ന ഇത്തരം കേന്ദ്ര-സംസ്ഥാന സർക്കാർ ഇടപെടലുകൾക്കെതിരെ ശക്തമായ പ്രതിഷേധം രേഖപ്പെടുത്തുന്നതായും സിപിഐഎം പ്രസ്താവനയിൽ കൂട്ടിച്ചേർത്തു.