ഹിന്ദുരാഷ്ട്രമെന്ന ആശയത്തെ രാജ്യത്തെ ന്യൂനപക്ഷങ്ങൾ ഭയപ്പെടേണ്ടതില്ലെന്നും ഇന്ത്യയിൽ മറ്റു മതസ്ഥർക്ക് യാതൊരുവിധ ഭീഷണിയുമില്ലെന്നും യോഗ ഗുരു ബാബാ രാംദേവ്. ഇന്ത്യക്കാരുടെയെല്ലാം പൂർവികർ ഒന്നാണെന്നും അതിൽ മതപരമായ വ്യത്യാസങ്ങളില്ലെന്നും അദ്ദേഹം പറഞ്ഞു. ഡൽഹിയിൽ സംസാരിക്കവെയാണ് ബാബാ രാംദേവ് ഇക്കാര്യം വ്യക്തമാക്കിയത്. 2009-ൽ ഉത്തർപ്രദേശിലെ പ്രശസ്തമായ മുസ്ലിം സെമിനാരിയായ ദിയോബന്ദ് സന്ദർശിച്ച കാര്യവും അദ്ദേഹം ചടങ്ങിൽ അനുസ്മരിച്ചു.
മതങ്ങൾ വ്യത്യസ്തമായിരിക്കാമെങ്കിലും നമ്മുടെ പാരമ്പര്യം ഒന്നാണെന്ന് അദ്ദേഹം ഓർമ്മിപ്പിച്ചു. ഹിന്ദുരാഷ്ട്രം സ്ഥാപിതമായാൽ മുസ്ലിംകൾ എങ്ങോട്ട് പോകുമെന്ന ആശങ്ക ചിലർ പങ്കുവെക്കുന്നുണ്ട്. എന്നാൽ, മുസ്ലിംകൾക്കോ ക്രിസ്ത്യാനികൾക്കോ ഹിന്ദുസ്ഥാനിൽ യാതൊരു അപകടവുമില്ല. താടി വളർത്താനും ഇഷ്ടമുള്ള വസ്ത്രം ധരിക്കാനും എല്ലാവർക്കും സ്വാതന്ത്ര്യമുണ്ട്. എന്നാൽ പൂർവികരുടെ സ്വഭാവശുദ്ധിയും പാരമ്പര്യവും എല്ലാവരും നെഞ്ചിലേറ്റണമെന്നും അദ്ദേഹം കൂട്ടിച്ചേർത്തു.
അതേസമയം, ബാബാ രാംദേവിന്റെ പ്രസ്താവനയ്ക്കെതിരെ പ്രതിപക്ഷ പാർട്ടികളിൽ നിന്ന് കടുത്ത വിമർശനമാണ് ഉയരുന്നത്. എല്ലാവരും സനാതനികളാണെങ്കിൽ പിന്നെ എന്തിനാണ് ഇത്രയധികം വിഭജനങ്ങൾ ഉണ്ടാക്കാൻ ശ്രമിക്കുന്നതെന്ന് മുതിർന്ന കോൺഗ്രസ് നേതാവ് സൽമാൻ ഖുർഷിദ് ചോദിച്ചു. ഭയപ്പെടേണ്ട സാഹചര്യമില്ലെന്ന് പറയുന്നവരുടെ ഉള്ളിലിരുപ്പ് എന്താണെന്ന് മനസ്സിലാക്കാൻ പ്രയാസമാണെന്നും, എല്ലാവരെയും സനാതനികളായി അംഗീകരിക്കാൻ കഴിയുമെങ്കിൽ പിന്നെ എന്തിനാണ് ഈ ഭിന്നതകളെന്നും അദ്ദേഹം ചോദിച്ചു.
രാജ്യത്തെ ജനങ്ങളെ യഥാർത്ഥ പ്രശ്നങ്ങളിൽ നിന്ന് വഴിതിരിച്ചുവിടാനുള്ള ബോധപൂർവ്വമായ ശ്രമമാണ് രാംദേവിന്റെ പ്രസ്താവനയെന്ന് സമാജ്വാദി പാർട്ടി നേതാവ് ഫക്രുൽ ഹസൻ ചാന്ദ് ആരോപിച്ചു. ഇത്തരം അനാവശ്യ വിവരണങ്ങൾ മുന്നോട്ടുവെച്ച് ജനശ്രദ്ധ തിരിക്കരുത്. ഇന്ത്യ എല്ലാ മതങ്ങളെയും ഒരുപോലെ ബഹുമാനിക്കുന്ന ആശയത്തിൽ അധിഷ്ഠിതമായ രാജ്യമാണെന്നും ഇത്തരം പ്രസ്താവനകൾ അതിന് മങ്ങലേൽപ്പിക്കുമെന്നും എൻസിപി വക്താവ് നസീം സിദ്ദിഖിയും പ്രതികരിച്ചു.