ഭാര്യ കൂടെ താമസിക്കാൻ വിസമ്മതിച്ചു; ഭർത്താവ് ഭാര്യ വീട്ടുകാരെ കൊലപ്പെടുത്തി

ലഖ്‌നൗ: ഭാര്യ തന്നോടൊപ്പം താമസിക്കാൻ വിസമ്മതിച്ചതിനെ തുടര്‍ന്ന് അമ്മായിയപ്പനെയും അമ്മായിയമ്മയെയും അതിദാരുണമായി കൊലപ്പെടുത്തി ഭർത്താവ്. ലഖ്‌നൗവിലെ വിജയ് ഖേഡയിൽ ബുധനാഴ്ച രാത്രി ഒമ്പത് മണിയോടെയാണ് നാടിനെ നടുക്കിയ സംഭവം നടന്നതെന്ന് പോലീസ് അറിയിച്ചു.

ജഗ്ദീപ് എന്നയാളാണ് ഭാര്യ പൂനം വീട്ടിലേക്ക് വരാൻ കൂട്ടാക്കാത്തതിലുള്ള ദേഷ്യത്തിൽ ഭാര്യയുടെ മാതാപിതാക്കളായ അനന്ത്രാമിനെയും (80) ഭാര്യയെയും (75) കുത്തിക്കൊലപ്പെടുത്തിയത്. കത്തി ഉപയോഗിച്ചാണ് പ്രതി ആക്രമണം നടത്തിയത്.

നിലവിളി കേട്ട് ഓടിയെത്തിയ നാട്ടുകാർ ഉടൻതന്നെ ജഗ്ദീപിനെ പിടികൂടി പോലീസിൽ ഏൽപ്പിക്കുകയായിരുന്നു. ഡെപ്യൂട്ടി പോലീസ് കമ്മീഷണർ ആശിഷ് ശ്രീവാസ്തവ മാധ്യമങ്ങളോട് സംസാരിക്കവെ ഇക്കാര്യം സ്ഥിരീകരിച്ചു.

ഗുരുതരമായി പരിക്കേറ്റ അനന്ത്രാമിനെയും ഭാര്യയെയും ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇരുവരും സംഭവസ്ഥലത്ത് വെച്ചുതന്നെ മരിച്ചതായി ഡോക്ടർമാർ അറിയിച്ചു. സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്. ഭാര്യ വീട്ടിലേക്ക് വരാത്തതിൻ്റെ കാരണം ഉൾപ്പെടെയുള്ള കാര്യങ്ങൾ പോലീസ് അന്വേഷിച്ചു വരികയാണ്.

അതേസമയം, ഡൽഹിയിൽ ഒരു അമ്മയെയും മകനെയും ഇരട്ടക്കൊലപാതകത്തിൽ മരിച്ച നിലയിൽ കണ്ടെത്തിയ സംഭവം പുറത്തുവന്നതിന് പിന്നാലെയാണ് ലഖ്‌നൗവിലെ ഈ ദാരുണ സംഭവം റിപ്പോർട്ട് ചെയ്യുന്നത്. രാജ്യതലസ്ഥാനത്തെ ലജ്പത് നഗറിൽ നടന്ന കൊലപാതകത്തിൽ വീട്ടുവേലക്കാരനെ പോലീസ് അറസ്റ്റ് ചെയ്തിട്ടുണ്ട്. ഈ രണ്ട് സംഭവങ്ങളും രാജ്യത്ത് വലിയ ഞെട്ടലുളവാക്കിയിരിക്കുകയാണ്.