ന്യൂഡൽഹി: അഞ്ചുനില കെട്ടിടം തകർന്നുവീണ് മൂന്ന് പേർ മരിച്ച ഡൽഹി സത്യനികേതൻ ദുരന്തത്തിൽ രക്ഷാപ്രവർത്തനം തുടരുന്നു. ഞായറാഴ്ച ഉച്ചയ്ക്ക് ഒന്നരയോടെയാണ് ഡൽഹി സർവകലാശാലയുടെ സൗത്ത് ക്യാമ്പസിന് സമീപമുള്ള പി.ജി ഹോസ്റ്റൽ കെട്ടിടം തകർന്നത്. ഒമ്പത് പേരെ ഇതിനകം രക്ഷപ്പെടുത്തി. അഞ്ച് പേരുടെ നില ഗുരുതരമാണെന്ന് പൊലീസ് അറിയിച്ചു. അപകടസമയത്ത് അൻപതോളം വിദ്യാർഥികൾ കെട്ടിടത്തിനുള്ളിലുണ്ടായിരുന്നുവെന്നാണ് വിവരം. അവശിഷ്ടങ്ങൾക്കിടയിൽ കുടുങ്ങിയ വിദ്യാർഥികൾ ഫോൺവിളിച്ച് തങ്ങൾ കുടുങ്ങിക്കിടക്കുകയാണെന്നും രക്ഷിക്കണമെന്നും അറിയിച്ചതായി പ്രദേശവാസികൾ പറഞ്ഞു.
കെട്ടിടത്തിനുള്ളിൽ കുടുങ്ങിയവരിൽ നിന്ന് ഇപ്പോഴും ഫോൺകോളുകൾ ലഭിക്കുന്നുണ്ടെന്നാണ് അപകടസ്ഥലം സന്ദർശിച്ച എംഎൽഎ അനിൽ ശർമ പറഞ്ഞത്. രക്ഷാപ്രവർത്തകർ ഇവരുമായി നിരന്തരം ആശയവിനിമയം നടത്തുന്നുണ്ട്. പരിക്കേറ്റ ആറ് പേരെ എയിംസിൽ പ്രവേശിപ്പിച്ച് ചികിത്സ നൽകുന്നുണ്ട്. വിവിധ സംസ്ഥാനങ്ങളിൽ നിന്നുള്ള വിദ്യാർഥികളാണ് ഇവിടെ താമസിച്ചിരുന്നതെന്ന് പ്രദേശവാസികൾ പറഞ്ഞു.
15 മുറികളുള്ള കെട്ടിടത്തിൽ ഓരോ മുറിയിലും രണ്ടോ മൂന്നോ വിദ്യാർഥികളാണ് താമസിച്ചിരുന്നത്. ഒരാൾക്ക് ഏകദേശം 12,000 രൂപ വരെയായിരുന്നു പ്രതിമാസ വാടക. മോട്ടിലാൽ നെഹ്റു കോളജ്, ആത്മാറാം സനാതൻ ധർമ കോളജ്, ശ്രീ വെങ്കടേശ്വര കോളജ് എന്നിവിടങ്ങളിൽ പഠിക്കുന്ന വിദ്യാർഥികളാണ് ഇവിടെ താമസിച്ചിരുന്നത്. കെട്ടിടത്തിന്റെ താഴത്തെ നിലയിൽ ചില നിർമാണ പ്രവർത്തനങ്ങൾ നടന്നുവരികയായിരുന്നുവെന്നും പ്രദേശവാസി പറഞ്ഞു.
അപകടത്തിന്റെ കാരണം സംബന്ധിച്ച കൂടുതൽ വിവരങ്ങൾ പുറത്തുവരാനിരിക്കെ, അവശിഷ്ടങ്ങൾക്കിടയിൽ കുടുങ്ങിയവരെ കണ്ടെത്താനും രക്ഷപ്പെടുത്താനുമുള്ള ശ്രമമാണ് ഇപ്പോൾ പുരോഗമിക്കുന്നത്. ഇതിനിടെ, കെട്ടിടത്തിലുണ്ടായിരുന്ന വിദ്യാർഥികളുടെ എണ്ണം, കെട്ടിടത്തിലെ നിർമാണ പ്രവർത്തനങ്ങൾ, അപകടത്തിലേക്ക് നയിച്ച സാഹചര്യം എന്നിവയും അന്വേഷണത്തിന്റെ ഭാഗമായി പരിശോധിക്കേണ്ടിവരും. സംഭവത്തിൽ കൂടുതൽ വിവരങ്ങൾ രക്ഷാപ്രവർത്തനം പൂർത്തിയാകുന്നതോടെ പുറത്തുവരുമെന്നാണ് പ്രതീക്ഷ.