ഏപ്രില്‍ 25 ന് കാണാം, ‘ട്രിപ്പിള്‍ കണ്‍ജങ്ഷന്‍’

പലവിധ ആകാശ പ്രതിഭാസങ്ങള്‍ക്ക് നാം സാക്ഷ്യം വഹിച്ചിട്ടുണ്ട്. സൂര്യഗ്രഹണവും ചന്ദ്രഗ്രഹണവും ഗ്രഹങ്ങളുടെ പരേഡും അങ്ങനെ ഉള്ള എല്ലാ കാഴ്ചകളും മനുഷ്യര്‍ക്ക് എപ്പോഴും അത്ഭുതം ഉളവാക്കുന്നവയാണ്. എന്നാൽ വളരെ അപൂർവമായി മാത്രം ആകാശത്ത് സംഭവിക്കുന്ന ഒന്നാണ് ഗ്രഹങ്ങളുടെ സംഗമങ്ങൾ. രാവിലെ ഉണർന്ന് ആകാശത്തേക്ക് നോക്കുമ്പോള്‍ ആകാശം നിങ്ങളെ നോക്കി ചിരിക്കുന്ന കാഴ്ചയാണ് നിങ്ങൾക്ക് കാണാൻ കഴിയുന്നതെങ്കിലോ? എത്ര മനോഹരമായിരിക്കും അല്ലെ? എന്നാൽ ഈ ആഴ്ച അത്തരം ഒരു കാഴ്ച കാണാന്‍ മനുഷ്യര്‍ക്ക് അവസരം ഒരുങ്ങുകയാണ്.

ശുക്രന്‍, ശനി എന്നീ ഗ്രഹങ്ങളുടെയും ഭൂമിയുടെ ഉപഗ്രഹമായ ചന്ദ്രന്റേയും അപൂര്‍വമായ സംഗമക്കാഴ്ചയാണ് ഇത്. ട്രിപ്പിള്‍ കണ്‍ജങ്ഷന്‍ എന്നറിയപ്പെടുന്ന ഈ പ്രതിഭാസത്തെ ഒരു ചിരിക്കുന്ന മുഖം പോലെയാണ് ഭൂമിയില്‍ നിന്ന് കാണപ്പെടുക. ലോകത്തെല്ലായിടത്തും തെളിഞ്ഞ കിഴക്കന്‍ ആകാശത്ത്, ഏപ്രില്‍ 25 വെള്ളിയാഴ്ച പുലര്‍ച്ചെ ഈ കാഴ്ച കാണാനാകുമെന്നാണ് നാസയുടെ വാനനിരീക്ഷകര്‍ പറയുന്നത്.

ഏപ്രില്‍ 25 ന് ഇന്ത്യന്‍ സമയം പുലര്‍ച്ചെ 5.30 ന് സൂര്യോദയത്തിന് ഒരു മണിക്കൂര്‍ മുമ്പായി ഈ ഗ്രഹ സംഗമം ആകാശത്ത് കാണാം. തുറസ്സായ കിഴക്കന്‍ ആകാശം കാണുന്ന പ്രദേശങ്ങളില്‍ നിന്ന് മാത്രമേ ഈ കാഴ്ച കാണാനാവൂ. തെളിഞ്ഞ കാലാവസ്ഥയാണെങ്കില്‍ നഗ്നനേത്രങ്ങള്‍ കൊണ്ട് ശുക്രന്‍, ശനി ഗ്രഹങ്ങളെ കാണാം. എന്നാല്‍ ചിരിക്കുന്ന മുഖം വ്യക്തമായി കാണണമെങ്കില്‍ ദൂരദര്‍ശിനിയോ ബൈനോക്കുലറോ ഉപയോഗിക്കേണ്ടി വരും. ഭാഗ്യമുണ്ടെങ്കില്‍ ഈ സ്‌മൈലി ഫേയ്‌സിന് താഴെയായി, ബുധനെയും കാണാനാവും.

ട്രിപ്പിള്‍ കണ്‍ജങ്ഷന്‍

രണ്ട് ബഹിരാകാശ വസ്തുക്കള്‍ ആകാശത്ത് അടുത്തടുത്തായി കാണപ്പെടുന്ന പ്രതിഭാസത്തെയാണ് കണ്‍ജങ്ഷന്‍ എന്ന് വിളിക്കുന്നത്. അത്തരത്തില്‍ മൂന്ന് ബഹിരാകാശ വസ്തുക്കള്‍ ഒന്നിച്ച് കാണപ്പെടുമ്പോഴാണ് ട്രിപ്പിള്‍ കണ്‍ജങ്ഷന്‍ എന്ന് വിളിക്കുന്നത്. അത്യപൂര്‍വമായി മാത്രമാണ് ട്രിപ്പിള്‍ കണ്‍ജങ്ഷന്‍ സംഭവിക്കാറ്. ഏപ്രില്‍ 25 ന് സംഭവിക്കുന്ന ഈ ട്രിപ്പിള്‍ കണ്‍ജങ്ഷനില്‍ ശുക്രനും ശനിയും ചിരിച്ചുകൊണ്ടിരിക്കുന്ന ഒരു മുഖത്തിലെ രണ്ട് കണ്ണുകളായും ചന്ദ്രക്കലരൂപത്തില്‍ കാണപ്പെടുന്ന ചന്ദ്രന്‍ ചിരിക്കുന്ന ഒരു പുഞ്ചിരി പോലെയും തോന്നും.