ലോകകപ്പിന്റെ വാണിജ്യ അവകാശങ്ങൾ സ്വകാര്യ നിക്ഷേപകർക്ക് നൽകാനുള്ള നീക്കം പരാജയപ്പെട്ടതിനെ തുടർന്ന് ശക്തമായ എതിർപ്പ് നേരിടുന്ന ഫിഫ പ്രസിഡന്റ് ജിയാനി ഇൻഫാന്റിനോയ്ക്ക് പിന്തുണയുമായി ആറ് അറബ് ഫുട്ബോൾ ഫെഡറേഷനുകൾ രംഗത്ത്. മൊറോക്കോ, ഖത്തർ, ഈജിപ്ത്, മൗറിറ്റാനിയ, ലെബനൻ, സുഡാൻ എന്നീ രാജ്യങ്ങളാണ് ഇൻഫാന്റിനോയുടെ നേതൃത്വത്തിൽ പരിപൂർണ്ണ വിശ്വാസം രേഖപ്പെടുത്തി സംയുക്ത പ്രസ്താവന ഇറക്കിയത്. ഫിഫ കൗൺസിൽ അംഗങ്ങൾ കൂടിയായ പ്രമുഖ ഫുട്ബോൾ ഭരണാധികാരികൾ ഒപ്പുവെച്ച പ്രസ്താവന, ആഗോള ഫുട്ബോളിന്റെ വളർച്ചയ്ക്ക് ഇൻഫാന്റിനോ നൽകിയ സംഭാവനകളെ പ്രകീർത്തിക്കുകയും അദ്ദേഹത്തോടൊപ്പം ചേർന്ന് പ്രവർത്തിക്കുമെന്നും വ്യക്തമാക്കുന്നു.
ലോക ഫുട്ബോളിൽ ഇൻഫാന്റിനോയ്ക്കെതിരെ വൻ പ്രതിഷേധം അലയടിക്കുന്നതിനിടയിലാണ് ഈ നിർണായക പിന്തുണ. ലോകകപ്പിന്റെ 20 ബില്യൺ അമേരിക്കൻ ഡോളറിന്റെ വാണിജ്യ ഘടനയുമായി ബന്ധപ്പെട്ട പദ്ധതിയാണ് വിവാദങ്ങൾക്ക് തിരികൊളുത്തിയത്. അംഗ രാജ്യങ്ങളുമായി കൂടിയാലോചിക്കാതെയാണ് ഫിഫ നേതൃത്വം നിക്ഷേപ നിർദ്ദേശം മുന്നോട്ടുവെച്ചതെന്ന് ആരോപിച്ച് യുവേഫ, ഏഷ്യൻ ഫുട്ബോൾ കോൺഫെഡറേഷൻ, കോൺകാകാഫ് എന്നീ ശക്തരായ ഭൂഖണ്ഡാന്തര സംഘടനകൾ രംഗത്തെത്തി. വിഷയം ഭരണപരമായ വിശ്വാസലംഘനമാണെന്ന് ചൂണ്ടിക്കാട്ടി ഇവർ സ്വതന്ത്ര അന്വേഷണത്തിന് ആവശ്യപ്പെട്ടിട്ടുണ്ട്.
വിവാദം കടുക്കവേ ഇൻഫാന്റിനോയുടെ ഫിഫ പ്രസിഡന്റ് സ്ഥാനത്തേക്കുള്ള നിലനിൽപ്പ് തന്നെ ചോദ്യം ചെയ്യപ്പെടുകയാണ്. അയർലൻഡ്, ഇംഗ്ലണ്ട്, വെയ്ൽസ് തുടങ്ങിയ ഫുട്ബോൾ അസോസിയേഷനുകൾ ഇൻഫാന്റിനോയ്ക്ക് നൽകിയിരുന്ന പിന്തുണ പിൻവലിച്ചു കഴിഞ്ഞു. ആവശ്യമെങ്കിൽ ഫിഫ ടൂർണമെന്റുകൾ ബഹിഷ്കരിക്കുന്നത് വരെ പരിഗണിക്കുമെന്ന് യുവേഫ മുന്നറിയിപ്പ് നൽകിയിട്ടുണ്ട്. 2027-ൽ നടക്കാനിരിക്കുന്ന ഫിഫ പ്രസിഡന്റ് തിരഞ്ഞെടുപ്പിൽ മുൻപ് എതിരില്ലാതെ ജയിക്കുമെന്ന് കരുതിയ ഇൻഫാന്റിനോയ്ക്ക്, പെട്ടെന്നുണ്ടായ ഈ രാഷ്ട്രീയ മാറ്റങ്ങൾ വലിയ തിരിച്ചടിയായി മാറിയിരിക്കുകയാണ്.
അതേസമയം, ഏഷ്യൻ ഫുട്ബോൾ രംഗത്ത് വ്യക്തമായ പിളർപ്പ് ഉണ്ടാക്കാനും ഈ സംഭവം കാരണമായി. ഇൻഫാന്റിനോയ്ക്കെതിരെ അന്വേഷണം ആവശ്യപ്പെട്ട എഎഫ്സിയുടെ നിലപാടിന് വിരുദ്ധമായി ഖത്തറും ലെബനനും ഇൻഫാന്റിനോയ്ക്കൊപ്പം നിലയുറപ്പിച്ചു. 2030 ലോകകപ്പിന് സഹആതിഥേയത്വം വഹിക്കുന്ന മൊറോക്കോയും ശക്തമായി അദ്ദേഹത്തെ പിന്തുണയ്ക്കുന്നുണ്ട്. നവംബർ 18-ന് തിരഞ്ഞെടുപ്പ് സ്ഥാനാർത്ഥിത്വത്തിനുള്ള അവസാന തീയതി അടുത്തിരിക്കെ, ഇൻഫാന്റിനോയുടെ ഫിഫയിലെ ഭാവി കൂടുതൽ അനിശ്ചിതത്വത്തിലേക്കും പോരാട്ടങ്ങളിലേക്കും നീങ്ങുകയാണ്.