ഇനി മുഖ്യമന്ത്രിയെയും മന്ത്രിമാരെയും സംബോധന ചെയ്യുമ്പോൾ ‘ബഹു’ ചേർക്കണം 

തിരുവനന്തപുരം: സർക്കാർ ഓഫീസുകളിലെ കത്തിടപാടുകളിൽ മുഖ്യമന്ത്രിക്കും മന്ത്രിമാർക്കും ബഹുമാന സൂചകമായി ‘ബഹു.മുഖ്യമന്ത്രി’, ‘ബഹു.മന്ത്രി’ എന്നിങ്ങനെ രേഖപ്പെടുത്തണമെന്ന് നിർദേശിച്ച് ഉദ്യോഗസ്ഥ ഭരണപരിഷ്കാര വകുപ്പ് സർക്കുലർ പുറത്തിറക്കി.

പൊതുജനങ്ങൾ വിവിധ ആവശ്യങ്ങൾ ഉന്നയിച്ച് മുഖ്യമന്ത്രിക്കും മന്ത്രിമാർക്കും നൽകുന്ന നിവേദനങ്ങളും പരാതികളും ബന്ധപ്പെട്ട വകുപ്പുകൾ പരിശോധിച്ച് തുടർ നടപടി സ്വീകരിക്കുന്നതാണ് പതിവ്. അതിനുശേഷം നിവേദകർക്കു നൽകുന്ന മറുപടി കത്തിലാണ് ബഹുമാന സൂചകം ഉറപ്പാക്കണമെന്ന് സർക്കുലർ വ്യക്തമാക്കുന്നത്. ഔദ്യോഗിക യോഗങ്ങളിൽ ഇത്തരം വിശേഷണങ്ങൾ പതിവായി ഉപയോഗിക്കാറുണ്ടെങ്കിലും, ചില കത്തിടപാടുകളിൽ അത് പാലിക്കാത്ത സാഹചര്യം നിലനിന്നിരുന്നു. ഇതിന്റെ പശ്ചാത്തലത്തിലാണ് സർക്കുലർ പുറത്തിറക്കിയത്.