ഐപിഎൽ 2026-ൽ ചെന്നൈ സൂപ്പർ കിംഗ്സ് നേരിട്ട കനത്ത പരാജയത്തിന് പിന്നാലെ, ക്യാപ്റ്റൻ റുതുരാജ് ഗെയ്ക്വാദിനെതിരെ സോഷ്യൽ മീഡിയയിൽ നടക്കുന്ന സൈബർ ആക്രമണങ്ങൾക്കും അധിക്ഷേപങ്ങൾക്കുമെതിരെ മുൻ സിഎസ്കെ താരം രവിചന്ദ്രൻ അശ്വിൻ രംഗത്ത്. കളിക്കാർ നേരിടുന്ന മോശം ഘട്ടങ്ങളെ ഇത്തരം ക്രൂരമായ രീതിയിൽ വിമർശിക്കുന്നത് അവസാനിപ്പിക്കണമെന്നും, റുതുരാജിന് പൂർണ്ണ പിന്തുണ നൽകണമെന്നുമാണ് അശ്വിൻ തന്റെ യൂട്യൂബ് ചാനലിലൂടെ ആരാധകരോട് ആവശ്യപ്പെട്ടത്.
റുതുരാജ് ഗെയ്ക്വാദ് മികച്ചൊരു കളിക്കാരനാണെന്നും, അദ്ദേഹത്തെ പിന്തുണയ്ക്കാൻ എല്ലാവരും തയ്യാറാകണമെന്നും അശ്വിൻ വ്യക്തമാക്കി. “റുതുരാജിനെതിരെ ഉയരുന്ന അധിക്ഷേപങ്ങൾ കാണുമ്പോൾ അത്ഭുതം തോന്നുന്നു. എന്തിനാണ് ഇത്തരം ക്രൂരമായ ട്രോളുകൾ എന്ന് മനസ്സിലാകുന്നില്ല. കരിയറിൽ ഏതൊരു വലിയ കളിക്കാരനും സംഭവിക്കാവുന്ന മോശം ഘട്ടം മാത്രമാണിത്,” അശ്വിൻ പറഞ്ഞു.
ഈ സീസണിൽ ബാറ്റിംഗിലും റുതുരാജ് വലിയ രീതിയിൽ പരാജയപ്പെട്ടിരുന്നു. 14 മത്സരങ്ങളിൽ നിന്ന് 123 എന്ന കുറഞ്ഞ സ്ട്രൈക്ക് റേറ്റിൽ 337 റൺസ് മാത്രമാണ് അദ്ദേഹത്തിന് നേടാനായത്. ഈ മോശം ഫോം കൂടി കണക്കിലെടുത്താണ് ആരാധകരിൽ നിന്ന് വലിയ വിമർശനങ്ങൾ ഉയർന്നത്. എന്നിരുന്നാലും, ഒരു ക്യാപ്റ്റൻ എന്ന നിലയിലും കളിക്കാരൻ എന്ന നിലയിലും റുതുരാജിനുള്ള പിന്തുണ ആവർത്തിച്ച് വ്യക്തമാക്കുകയാണ് അശ്വിൻ ചെയ്തത്.