തിരുവനന്തപുരം: പിഎം ശ്രീ പദ്ധതിയുമായി ബന്ധപ്പെട്ട വിവാദത്തിൽ കോൺഗ്രസിനും മുസ്ലിം ലീഗിനുമെതിരെ വിമർശനവുമായി മുൻ വിദ്യാഭ്യാസമന്ത്രി വി. ശിവൻകുട്ടി. മുമ്പ് ശക്തമായി എതിർത്ത പദ്ധതിയാണ് ഇപ്പോൾ നടപ്പാക്കാൻ ശ്രമിക്കുന്നതെന്നും ഇതിന് ജനങ്ങളോട് മാപ്പ് പറയണമെന്നും അദ്ദേഹം ആവശ്യപ്പെട്ടു. പിഎം ശ്രീ പദ്ധതിക്കെതിരെ മുൻപ് ഉയർത്തിയ ആരോപണങ്ങൾ അടിസ്ഥാനരഹിതമായിരുന്നുവെന്ന് സമ്മതിച്ച് കോൺഗ്രസും മുസ്ലിം ലീഗും പരസ്യമായി നിലപാട് വ്യക്തമാക്കണമെന്നും ശിവൻകുട്ടി പറഞ്ഞു.
കേരളത്തിന്റെ പുരോഗമന വിദ്യാഭ്യാസ നയത്തെ കേന്ദ്ര സർക്കാരിന് മുന്നിൽ അടിയറവ് വയ്ക്കുന്ന സമീപനമാണ് ഇപ്പോൾ സ്വീകരിക്കുന്നതെന്നും അദ്ദേഹം ആരോപിച്ചു.എൽഡിഎഫ് സർക്കാർ നടപ്പാക്കേണ്ടതില്ലെന്ന് തീരുമാനിച്ച പദ്ധതിയാണ് ഇപ്പോൾ യുഡിഎഫ് മുന്നോട്ട് കൊണ്ടുപോകാൻ ശ്രമിക്കുന്നതെന്ന് ശിവൻകുട്ടി ചൂണ്ടിക്കാട്ടി. പദ്ധതിക്കെതിരെ മുൻപ് നിലപാട് എടുത്ത നേതാക്കളിൽ ചിലർ ഇപ്പോൾ മൗനം പാലിക്കുകയാണെന്നും അദ്ദേഹം വിമർശിച്ചു.
സമഗ്ര ശിക്ഷ കേരള (എസ്എസ്കെ) ഫണ്ട് തടഞ്ഞുവെച്ച് സാധാരണ വിദ്യാർത്ഥികളുടെ പഠനത്തെ ബാധിക്കുന്ന തരത്തിലാണ് കേന്ദ്ര സർക്കാർ പ്രവർത്തിക്കുന്നതെന്നും അദ്ദേഹം ആരോപിച്ചു. ഈ സാഹചര്യത്തിൽ കേന്ദ്രത്തിന്റെ നയങ്ങൾക്ക് അനുകൂലമായി പ്രവർത്തിക്കുകയാണ് യുഡിഎഫ് സർക്കാരെന്ന് ശിവൻകുട്ടി വിമർശിച്ചു.
പിഎം ശ്രീ പദ്ധതി കേരളത്തിൽ നടപ്പാക്കില്ലെന്ന് എൽഡിഎഫ് സർക്കാർ നേരത്തെ രേഖാമൂലം കേന്ദ്രത്തെ അറിയിച്ചിരുന്നു. അതേ നിലപാടിൽ തന്നെയാണ് ഇടതുമുന്നണി ഇപ്പോഴും ഉറച്ചുനിൽക്കുന്നതെന്നും അദ്ദേഹം പറഞ്ഞു. പദ്ധതി നടപ്പാക്കാനുള്ള ഏത് നീക്കത്തെയും ശക്തമായി എതിർക്കുമെന്നും ശിവൻകുട്ടി വ്യക്തമാക്കി.