പഞ്ചാബ് മുഖ്യമന്ത്രി ആശുപത്രിയിൽ! ആരോഗ്യനില വെളിപ്പെടുത്താതെ ആശുപത്രി

മൊഹാലി: പഞ്ചാബ് മുഖ്യമന്ത്രി ഭഗവന്ത് മാന്റെ ആരോഗ്യനിലയിൽ പെട്ടെന്നുണ്ടായ മാറ്റം സംസ്ഥാനത്ത് ആശങ്ക പടർത്തുന്നു. ക്ഷീണവും ഹൃദയമിടിപ്പ് കുറവും അനുഭവപ്പെട്ടതിനെ തുടർന്ന് അദ്ദേഹത്തെ മൊഹാലിയിലെ ഫോർട്ടിസ് ആശുപത്രിയിൽ പ്രവേശിപ്പിച്ചു. ഭാര്യ ഡോ. ഗുർപ്രീത് കൗർ മാൻ അദ്ദേഹത്തോടൊപ്പം ഉണ്ടായിരുന്നു. നിലവിൽ ഐസൊലേഷൻ ഐസിയുവിൽ കഴിയുന്ന അദ്ദേഹത്തിന്റെ ആരോഗ്യനില ഡോക്ടർമാർ സൂക്ഷ്മമായി നിരീക്ഷിച്ചുവരികയാണ്.

മുഖ്യമന്ത്രിയെ ആശുപത്രിയിലെത്തിച്ചപ്പോൾ അദ്ദേഹത്തിൻ്റെ ആരോഗ്യനില മോശമായിരുന്നു എന്നും, ചികിത്സകൾക്ക് ശേഷം അത് മെച്ചപ്പെട്ടുവെന്നും ഫോർട്ടിസ് ആശുപത്രി പുറത്തിറക്കിയ പ്രസ്താവനയിൽ പറയുന്നു. “ക്ഷീണവും ഹൃദയമിടിപ്പ് കുറവും കാരണം ഭഗവന്ത് മാനിനെ ആശുപത്രിയിലെത്തിച്ചു. എത്തിച്ചേർന്നപ്പോൾ അദ്ദേഹത്തിൻ്റെ ആരോഗ്യ സൂചകങ്ങൾ വിലയിരുത്തി സ്ഥിരത കൈവരിച്ചു. നിലവിൽ അദ്ദേഹം നിരീക്ഷണത്തിലാണ്, അദ്ദേഹത്തിൻ്റെ പൾസ് നിരക്ക് മെച്ചപ്പെട്ടിട്ടുണ്ട്. ഞങ്ങളുടെ മെഡിക്കൽ സംഘം അദ്ദേഹത്തിൻ്റെ അവസ്ഥ സൂക്ഷ്മമായി നിരീക്ഷിക്കുന്നു,” പ്രസ്താവനയിൽ വ്യക്തമാക്കി.

അസുഖം കാരണം വെള്ളപ്പൊക്ക ബാധിത പ്രദേശങ്ങൾ സന്ദർശിക്കാൻ ആം ആദ്മി പാർട്ടി ദേശീയ കൺവീനർ അരവിന്ദ് കെജ്‌രിവാളിനൊപ്പം പോകാൻ ഭഗവന്ത് മാനിന് സാധിച്ചിരുന്നില്ല. ഇതിനു പിന്നാലെയാണ് പെട്ടെന്ന് ആരോഗ്യനില വഷളായി ആശുപത്രിയിൽ പ്രവേശിപ്പിച്ചത്. ഇന്ന് നടക്കാനിരുന്ന മന്ത്രിസഭാ യോഗം റദ്ദാക്കിയെങ്കിലും, ഔദ്യോഗികമായി ഒരു വിശദീകരണവും ലഭിച്ചിട്ടില്ല. ഈ അപ്രതീക്ഷിത സംഭവവികാസങ്ങൾ സംസ്ഥാനത്തെ ജനങ്ങൾക്കിടയിലും രാഷ്ട്രീയ വൃത്തങ്ങളിലും വലിയ ആശങ്കകൾക്ക് വഴിവെച്ചിട്ടുണ്ട്. അദ്ദേഹത്തിൻ്റെ ആരോഗ്യസ്ഥിതിയെക്കുറിച്ച് കൂടുതൽ വിവരങ്ങൾ പുറത്തുവരുമോ എന്ന് ഉറ്റുനോക്കുകയാണ് എല്ലാവരും.