നീറ്റ് പരീക്ഷാ ചോർച്ച ഉൾപ്പെടെയുള്ള വ്യാപക ക്രമക്കേടുകളിലും ഡൽഹിയിൽ സമരം ചെയ്ത വിദ്യാർത്ഥികൾക്ക് നേരെയുണ്ടായ ക്രൂരമായ പോലീസ് അതിക്രമത്തിലും സഭാ നടപടികൾ നിർത്തിവെച്ച് ചർച്ച ചെയ്യണമെന്ന് ആവശ്യപ്പെട്ട് കേരളത്തിൽ നിന്നുള്ള ഇടത് രാജ്യസഭാ എംപിമാർ നോട്ടീസ് നൽകി. എംപിമാരായ ഡോ. ജോൺ ബ്രിട്ടാസ്, ഡോ. വി. ശിവദാസൻ, എ.എ. റഹീം എന്നിവരാണ് രാജ്യസഭാ ചട്ടം 267 പ്രകാരം നോട്ടീസ് സമർപ്പിച്ചത്. പരീക്ഷാ നടത്തിപ്പിലുണ്ടായ അഴിമതിയുടെ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ അടിയന്തരമായി രാജിവെക്കണമെന്ന് ജോൺ ബ്രിട്ടാസ് നോട്ടീസിൽ ആവശ്യപ്പെട്ടു.
സമാധാനപരമായി ജനാധിപത്യ രീതിയിൽ പ്രതിഷേധിച്ച വിദ്യാർത്ഥികളെയും യുവാക്കളെയും ഡൽഹി പോലീസ് ക്രൂരമായി മർദ്ദിച്ച വിഷയം സഭ ഗൗരവമായി ചർച്ച ചെയ്യണമെന്ന് ഡോ. വി. ശിവദാസനും എ.എ. റഹീമും സഭയിൽ ഉന്നയിച്ചു. വരുംതലമുറയുടെ ഭാവിയെ ബാധിക്കുന്ന പരീക്ഷാ നടത്തിപ്പിലെ സുതാര്യത ഉറപ്പാക്കണമെന്നും, പ്രതിഷേധക്കാർക്ക് നേരെ അനാവശ്യമായി ബലപ്രയോഗം നടത്തിയ പോലീസ് ഉദ്യോഗസ്ഥർക്കെതിരെ ശക്തമായ നടപടി സ്വീകരിക്കണമെന്നുമാണ് എംപിമാർ പ്രധാനമായും ആവശ്യപ്പെടുന്നത്.