ദേശീയതലത്തിലെ പരീക്ഷാ ക്രമക്കേടുകളിൽ പ്രതിഷേധിച്ച് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജിയാവശ്യപ്പെട്ട് ഡൽഹി ജന്തർമന്തറിൽ നടക്കുന്ന സമരം പുതിയ രാഷ്ട്രീയ തലങ്ങളിലേക്ക്. കോക്രോച്ച് ജനതാ പാർട്ടിയുടെ (സിജെപി) നേതൃത്വത്തിൽ നടക്കുന്ന ഈ ശക്തമായ പ്രതിഷേധത്തിനും പരിസ്ഥിതി പ്രവർത്തകൻ സോനം വാങ്ചുക്ക് നടത്തുന്ന നിരാഹാര സമരത്തിനും പിന്തുണയുമായി പ്രമുഖ ഇടതുപക്ഷ നേതാക്കളായ എം.എ. ബേബിയും ബൃന്ദ കാരാട്ടും സമരപ്പന്തലിലെത്തി. പരീക്ഷാ ക്രമക്കേടുകളിൽ കേന്ദ്ര സർക്കാർ കാട്ടുന്ന അനാസ്ഥയ്ക്കെതിരെയും വിദ്യാർത്ഥികളുടെ ഭാവി തകർക്കുന്ന നിലപാടുകൾക്കെതിരെയും ശക്തമായ സ്വരത്തിലാണ് നേതാക്കൾ പ്രതികരിച്ചത്. ഈ പ്രതിഷേധം എത്രകാലം നീണ്ടുനിന്നാലും അതിനൊപ്പം സി.പി.ഐ.എം അണിചേരുമെന്നും, വിദ്യാർത്ഥികളുടെ ജീവിതം വെച്ചുള്ള കേന്ദ്രത്തിന്റെ കളി അനുവദിക്കില്ലെന്നും സമരവേദിയിൽ വെച്ച് എം.എ. ബേബി വ്യക്തമാക്കി.
അതേസമയം, ജന്തർമന്തറിൽ സമാധാനപരമായി സമരം ചെയ്യുന്നവർക്ക് കുടിവെള്ളം ഉൾപ്പെടെയുള്ള പ്രാഥമിക സൗകര്യങ്ങൾ പോലും ഡൽഹി പൊലീസ് നിഷേധിക്കുകയാണെന്ന് സിജെപി സ്ഥാപകൻ അഭിജീത് ദിപ്കെ ഗുരുതരമായ ആരോപണം ഉന്നയിച്ചു. എന്നാൽ ഈ ആരോപണങ്ങൾ അടിസ്ഥാനരഹിതമാണെന്നാണ് ഡൽഹി പൊലീസിന്റെ ഔദ്യോഗിക വിശദീകരണം. സമരം ശക്തമാകുന്ന സാഹചര്യത്തിൽ വിവിധ സംസ്ഥാനങ്ങളിൽ നിന്നുള്ള കർഷക നേതാക്കളും ഖാപ്പ് പ്രതിനിധികളും ഇന്ന് തന്നെ ജന്തർമന്തറിലേക്ക് എത്തും. വിദ്യാഭ്യാസ മന്ത്രിയുടെ രാജി എന്ന ലക്ഷ്യത്തിൽ നിന്നും ഒരടി പോലും പിന്നോട്ടില്ലെന്ന ഉറച്ച പ്രഖ്യാപനവുമായി സോനം വാങ്ചുകിനൊപ്പം വിദ്യാർത്ഥി സമൂഹവും പോരാട്ടം തുടരുകയാണ്.