രാജ്യത്ത് വലിയ രാഷ്ട്രീയ കോലാഹലങ്ങൾക്ക് വഴിവെച്ച ചോദ്യപേപ്പർ ചോർച്ചാ വിവാദത്തിൽ കേന്ദ്ര സർക്കാരിനെതിരെ കടുത്ത നിലപാടുമായി ലോക്സഭാ പ്രതിപക്ഷ നേതാവ് രാഹുൽ ഗാന്ധി രംഗത്തെത്തി. വിദ്യാഭ്യാസ മന്ത്രി ധർമേന്ദ്ര പ്രധാൻ രാജി വെച്ചില്ലെങ്കിൽ പ്രക്ഷോഭം രാജ്യവ്യാപകമാക്കുമെന്ന് അദ്ദേഹം മുന്നറിയിപ്പ് നൽകി. ധർമേന്ദ്ര പ്രധാൻ ക്രിമിനൽ മന്ത്രിയാണെന്നും അദ്ദേഹത്തിന്റെ രാജി ആവശ്യപ്പെടുകയാണെന്നും രാഹുൽ വ്യക്തമാക്കി. രാജി ചോദിച്ചു വാങ്ങിയില്ലെങ്കിൽ അടുത്ത ഉന്നം പ്രധാനമന്ത്രിയായിരിക്കുമെന്നും, പ്രധാനമന്ത്രിയുടെ കസേര നഷ്ടപ്പെടുമെന്നും അദ്ദേഹം തുറന്നടിച്ചു. രാജി വെക്കാതെ ആരും ഇവിടം വിട്ടുപോകില്ലെന്നും തങ്ങളും വിദ്യാർത്ഥികളും ഒറ്റക്കെട്ടായി നിലപാട് വ്യക്തമാക്കിക്കഴിഞ്ഞതായും അദ്ദേഹം കൂട്ടിച്ചേർത്തു.
പ്രതിഷേധത്തിനിടയിലെ സംഭവവികാസങ്ങൾ ചൂണ്ടിക്കാണിച്ചുകൊണ്ട് രാഹുൽ ഗാന്ധി മാധ്യമങ്ങൾക്ക് മുന്നിൽ ശക്തമായ തെളിവുകൾ നിരത്തി. പോലീസ് ലാത്തിച്ചാർജിനിടെ പരിക്കേറ്റ ഒരു യുവാവിനെ അദ്ദേഹം മാധ്യമങ്ങൾക്ക് മുന്നിൽ നേരിട്ട് അവതരിപ്പിച്ചു. സർക്കാരിന്റെ ഈ ജനവിരുദ്ധ നയങ്ങൾക്കും പോലീസ് അതിക്രമങ്ങൾക്കും എതിരെ വിദ്യാർത്ഥി സമൂഹത്തോടൊപ്പം ശക്തമായ പ്രതിഷേധവുമായി പ്രതിപക്ഷം മുന്നോട്ട് പോകുമെന്ന് അദ്ദേഹം ആവർത്തിച്ചു വ്യക്തമാക്കി.
അതേസമയം, രാജ്യവ്യാപകമായി പ്രതിഷേധം ശക്തമാകുന്നതിനിടയിൽ ചോദ്യപേപ്പർ ചോർച്ചയ്ക്കെതിരെയുള്ള ശിക്ഷാ നടപടികൾ കർശനമാക്കുന്നതിനുള്ള ബില്ലിന് കേന്ദ്ര മന്ത്രിസഭ അംഗീകാരം നൽകി. ജൂലൈ 27 ന് ഈ ബിൽ ലോക്സഭയിൽ അവതരിപ്പിക്കും. ചോദ്യപേപ്പർ ചോർച്ച കേസുകളിൽ 10 കോടി രൂപ വരെ പിഴയും 10 വർഷം വരെ തടവും ശിക്ഷ ലഭിക്കാവുന്ന വ്യവസ്ഥകളാണ് പുതിയ ബില്ലിൽ ഉൾപ്പെടുത്തിയിട്ടുള്ളത്. കൂടാതെ, ഇത്തരം കേസുകളിലെ വിചാരണ നടപടികൾ മൂന്ന് മാസത്തിനുള്ളിൽ പൂർത്തിയാക്കണമെന്നും ബില്ലിൽ കർശന വ്യവസ്ഥ ചെയ്തിട്ടുണ്ട്.