തിരുവനന്തപുരം: ഏഷ്യൻ ഗെയിംസിൽ മെഡൽ കരസ്ഥമാക്കിയ വിദർശയ്ക്ക് കേരളത്തിൽ തന്നെ ഔദ്യോഗിക ജോലി നൽകുമെന്ന് കായിക വകുപ്പ് മന്ത്രി ഒ.ജെ. ജനീഷ് പ്രഖ്യാപിച്ചു. കായിക മേഖലയിൽ അസാധാരണ മികവ് തെളിയിക്കുന്ന താരങ്ങൾക്ക് ഇനി നേരിട്ട് കായിക വകുപ്പിൽ തന്നെ തൊഴിൽ നൽകാൻ സർക്കാർ പ്രത്യേക നടപടി സ്വീകരിക്കും. യഥാർത്ഥ സ്പോർട്സ്മാൻ സ്പിരിറ്റ് ഉൾക്കൊണ്ടുകൊണ്ട് ഈ വകുപ്പ് കൂടുതൽ കാര്യക്ഷമമായി മുന്നോട്ടുപോകുമെന്നും അദ്ദേഹം വ്യക്തമാക്കി. ആര്യനാട് ഗ്രാമപഞ്ചായത്ത് വിദർശയ്ക്ക് നൽകിയ ഊഷ്മളമായ പൗരസ്വീകരണ ചടങ്ങിലാണ് മന്ത്രി ഈ സുപ്രധാന പ്രഖ്യാപനം നടത്തിയത്.
അർഹമായ ആനുകൂല്യങ്ങളും പ്രഖ്യാപനങ്ങളും യാതൊരു താമസമില്ലാതെ മുൻകൂട്ടി നൽകുക എന്നതാണ് സർക്കാരിന്റെ പ്രധാന നയം. മെഡൽ ജേതാക്കൾക്ക് നൽകാനുള്ള സാമ്പത്തിക പാരിതോഷികത്തിന്റെ ഫയൽ നടപടികൾ പൂർത്തിയായിക്കഴിഞ്ഞു. ഈ അവാർഡുകളുടെ വിതരണം വരുന്ന ഒക്ടോബർ 13-ന് ജി.വി. രാജയുടെ ജന്മദിനത്തിൽ തിരുവനന്തപുരത്ത് വെച്ച് ഔദ്യോഗികമായി നടക്കുന്ന ചടങ്ങിൽ വെച്ച് കൈമാറുമെന്നും മന്ത്രി അറിയിച്ചു.
കായിക വകുപ്പിന്റെ പ്രവർത്തനങ്ങളിൽ കൂടുതൽ സൂക്ഷ്മതയും വേഗതയും ഉറപ്പുവരുത്തുമെന്നും, ഫയലുകൾ അനന്തമായി വൈകിപ്പിക്കുന്ന ഉദ്യോഗസ്ഥ ശൈലി ഇനി അനുവദിക്കില്ലെന്നും അദ്ദേഹം മുന്നറിയിപ്പ് നൽകി. താൻ പുതിയൊരു കായിക ഇനമായ ഷൂട്ടിംഗ് പഠിക്കാൻ തീരുമാനിച്ചിട്ടുണ്ടെന്നും, ഒരു രാഷ്ട്രീയപ്രവർത്തകൻ എന്ന നിലയ്ക്ക് നിലവിലെ സാഹചര്യത്തിൽ അതാണ് ഏറ്റവും നല്ലതെന്ന് തോന്നുന്നുവെന്നും ഒ.ജെ. ജനീഷ് തമാശകലർന്ന രീതിയിൽ കൂട്ടിച്ചേർത്തു.