ആറര ലക്ഷം രൂപയുടെ ജേഴ്‌സി മോഷ്ടിച്ചു; സ്റ്റേഡിയത്തിലെ സെക്യൂരിറ്റി ജീവനക്കാരൻ പിടിയിൽ

മുംബൈയിലെ വാങ്കഡെ സ്റ്റേഡിയത്തിലെ ബിസിസിഐയുടെ സ്റ്റോർ റൂമിൽ കള്ളൻ കയറി. മുഴുവൻ സമയ നിരീക്ഷണ സംവിധാനവും സുരക്ഷാ സംവിധാനവുമുള്ള സ്റ്റേഡിയത്തിലെ ഓഫീസ് മുറിയിൽ കയറിയത് സുരക്ഷാ ചുമതലയുള്ള ​ജീവനക്കാരൻ തന്നെ എന്നതാണ് ഇതിൻ്റെ കൗതുകം. 6.52 ലക്ഷം രൂപയുടെ ഐ പി എൽ ജേഴ്സികളാണ് ഇയാൾ ഇവിടെ നിന്ന് മോഷ്ടിച്ചത്.

സംഭവവുമായി ബന്ധപ്പെട്ട് സെക്യൂരിറ്റി മാനേജർ ഫാറൂഖ് അസ്‍ലം ഖാനെ പൊലീസ് അറസ്റ്റ് ചെയ്തു. ജൂൺ 13നായിരുന്നു സംഭവം നടന്നത്. 261 ജേഴ്സികൾ അടങ്ങിയ വലിയ ബോക്സാണ് മോഷ്ടിച്ചത്. 2500 രൂപ വീതമായിരുന്നു ഈ ഔദ്യോഗിക ജേഴ്‌സിയുടെ വില. കഴിഞ്ഞ ദിവസങ്ങളിൽ ഓഡിറ്റിങ്ങിൽ ജേഴ്സി സ്റ്റോക്കിൽ കാര്യമായ കുറവ് കണ്ടെത്തിയതോടെ അധികൃതർ സി സി ടി വി ദൃശ്യങ്ങൾ പരിശോധിക്കുകയായിരുന്നു. തുടർന്നാണ് മോഷണം കണ്ടെത്തിയത്. ശേഷം പൊലീസിൽ പരാതി നൽകുകയും പ്രതിയെ അറസ്റ്റ് ചെയ്യുകയുമായിരുന്നു.