ഭരണഘടനാ വിരുദ്ധം: ഭാര്യയുടെ കന്യകാത്വ പരിശോധന ആവശ്യപ്പെട്ട ഭർത്താവിന്റെ ഹർജി തള്ളി കോടതി 

കന്യകാത്വ പരിശോധന ഭരണഘടനാ വിരുദ്ധവും ഇന്ത്യൻ ഭരണഘടനയുടെ ആർട്ടിക്കിൾ 21 ന്റെ ലംഘനവുമാണെന്ന് ചൂണ്ടിക്കാണിച്ച് ഛത്തീസ്ഗഡ് ഹൈക്കോടതി. ഭാര്യയുടെ കന്യകാത്വ പരിശോധന നടത്തണമെന്ന് ആവശ്യപ്പെട്ട് ഭർത്താവ് സമർപ്പിച്ച ഹർജി തള്ളിക്കൊണ്ടാണ് ജസ്റ്റിസ് അരവിന്ദ് കുമാർ വർമ്മ അധ്യക്ഷനായ കോടതി വിധി പറഞ്ഞത്.

“പ്രതിയുടെയോ ഭാര്യയുടെയോ കന്യകാത്വ പരിശോധന നടത്തണമെന്ന ഹർജിക്കാരന്റെ വാദം ഭരണഘടനാ വിരുദ്ധമാണെന്നും സ്ത്രീകളുടെ അന്തസ്സിനുള്ള അവകാശം ഉൾപ്പെടുന്ന ഭരണഘടനയുടെ ആർട്ടിക്കിൾ 21 ന്റെ ലംഘനമാണെന്നും കോടതി വിധിച്ചു… ഒരു സ്ത്രീയെയും കന്യകാത്വ പരിശോധന നടത്താൻ നിർബന്ധിക്കാനാവില്ല.” കോടതി വ്യക്തമാക്കി.

2024 ജൂലൈ 2 ന് റായ്ഗഡിലെ കുടുംബ കോടതിയിൽ ഭാരതീയ നാഗരിക് സുരക്ഷാ സംഹിത (ബിഎൻഎസ്എസ്) 2023 ലെ സെക്ഷൻ 144 പ്രകാരം ഭാര്യ സമർപ്പിച്ച ജീവനാംശം ഹർജി പരിഗണിക്കുകയായിരുന്നു കോടതി. കേസ് തെളിവ് ഘട്ടത്തിൽ ആയിരിക്കെ, ഭർത്താവിൽ നിന്ന് പ്രതിമാസം 20,000 രൂപ ഇടക്കാല ജീവനാംശം ആവശ്യപ്പെട്ടാണ് യുവതിയുടെ ഹർജി.

ഭർത്താവിന് ശാരീരിക ബലഹീനതയുണ്ടായിരുന്നതിനാൽ ശാരീരിക ബന്ധം സ്ഥാപിക്കാൻ കഴിഞ്ഞില്ലെന്ന പരാതി ഉയർത്തിയ ഭാര്യ, ഈ ആരോപണങ്ങൾ കുടുംബവുമായി പങ്കുവെക്കുകയും ഭർത്താവുമായി സഹവസിക്കാൻ വിസമ്മതിക്കുകയും ചെയ്തു. മറുവശത്ത്, ഭാര്യ തന്റെ സഹോദരി ഭർത്താവുമായി അവിഹിത ബന്ധത്തിൽ ഏർപ്പെട്ടിട്ടുണ്ടെന്ന് ഭർത്താവ് ആരോപിച്ചു. ജീവനാംശ നടപടികളിൽ തന്റെ വാദത്തിന്റെ ഭാഗമായി, ഭാര്യയുടെ കന്യകാത്വ പരിശോധനയ്ക്കായി കുടുംബ കോടതിയിൽ നിന്ന് ഉത്തരവ് തേടുകയുമായിരുന്നു.

കന്യകാത്വ പരിശോധനയ്ക്കുള്ള അപേക്ഷ കുടുംബ കോടതി തള്ളിക്കളഞ്ഞു. ദമ്പതികൾക്കിടയിൽ ശാരീരിക ബന്ധമില്ലെന്ന് സ്ഥാപിക്കുന്നതിനും ഭാര്യയുടെ അവിഹിത ബന്ധത്തെക്കുറിച്ചുള്ള തന്റെ വാദം തെളിയിക്കുന്നതിനും ഈ പരിശോധന അനിവാര്യമായതിനാൽ തന്റെ അപേക്ഷ നിരസിച്ചതിൽ കുടുംബ കോടതിക്ക് തെറ്റുപറ്റിയെന്ന് വാദിച്ചുകൊണ്ടാണ് ഭർത്താവ് ഹൈക്കോടതിയെ സമീപിച്ചത്.

ഡൽഹി ഹൈക്കോടതിയുടെ വിധിയെ അടിസ്ഥാനമാക്കി, കന്യകാത്വ പരിശോധന ഭരണഘടനാ വിരുദ്ധമാണെന്നും അന്തസ്സിനുള്ള അവകാശം ഉൾപ്പെടെയുള്ള ഭരണഘടനയുടെ ആർട്ടിക്കിൾ 21 ന്റെ ലംഘനമാണെന്നും ഹൈക്കോടതി ആവർത്തിച്ചു.

ഭർത്താവിന്റെ അപേക്ഷ തള്ളിക്കളഞ്ഞ കോടതി, സ്വയം വൈദ്യപരിശോധനയ്ക്ക് വിധേയനാകുകയോ സ്വീകാര്യമായ മറ്റ് തെളിവുകൾ ഹാജരാക്കുകയോ ചെയ്തുകൊണ്ട് ലൈംഗിക ബലഹീനതയെക്കുറിച്ചുള്ള ആരോപണങ്ങൾ നിഷേധിക്കാമെന്ന് പറഞ്ഞു.

ആക്ഷേപിക്കപ്പെട്ട ഉത്തരവ് നിയമവിരുദ്ധമോ വികലമോ അല്ലെന്നും വിചാരണ കോടതിയിൽ നിന്ന് ജുഡീഷ്യൽ പിഴവ് സംഭവിച്ചിട്ടില്ലെന്നും, വിധിച്ചുകൊണ്ട് കോടതി, കുടുംബ കോടതിയുടെ ഉത്തരവ് ശരിവച്ചു.