ആടുജീവിതം ഓഡിയോ ലോഞ്ച് മാർച്ച് പത്തിന്

പൃഥ്വിരാജിൻ്റെ ആടുജീവിതം ചിത്രത്തിൻ്റെ റിലീസ് ഏപ്രിൽ 10ന് പകരം മാർച്ച് 28 ന് ആകിയതോടെ റിലീസിനായുള്ള തയ്യാറെടുപ്പുകൾ മികച്ച രീതിയിൽ നടക്കുകയാണ്. സിനിമയുടെ ഓഡിയോ ലോഞ്ച് മാർച്ച് പത്തിന് നടക്കും. അഡ്‌ലക്‌സ് കൺവെൻഷൻ സെൻ്റർ അങ്കമാലിയിൽ ആണ് പരുപാടി നടക്കുക.

ബെന്യാമിന്റെ ‘ആടുജീവിത’ത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. സൗദി അറേബ്യയിലെ ഇന്ത്യൻ കുടിയേറ്റ തൊഴിലാളിയായ നജീബ് എന്ന കഥാപാത്രത്തെയാണ് ചിത്രത്തിൽ പൃഥ്വി അവതരിപ്പിക്കുന്നത്. 160ന് മുകളില്‍ ദിവസങ്ങളാണ് ആടുജീവിതത്തിന്‍റെ ചിത്രീകരണത്തിന് വേണ്ടി വന്നത്. കൊവിഡ് മഹാമാരി സിനിമയുടെ ചിത്രീകരണം നീളുന്നതിന് കാരണമായിരുന്നു. കൊറോണ ഡേയ്സ് എന്ന ഡോക്യുമെന്ററി അടുത്തിടെ ചിത്രത്തിന്റെ അണിയറ പ്രവർത്തകർ പുറത്തു വിട്ടിരുന്നു.

കഴിഞ്ഞ വര്‍ഷം ഏപ്രിലിൽ ആടുജീവിതത്തിന്റെ ഗ്ലിപ്സ് എന്ന നിലയിൽ ഒരു വീഡിയോ പുറത്തെത്തിയിരുന്നു. മികച്ച അഭിപ്രായമാണ് ഈ വീഡിയോയ്ക്ക് ലഭിച്ചത്. മലയാള സിനിമയിൽ ഇതുവരെ കണ്ട ദൃശ്യാവിഷ്കാരത്തിൽ നിന്ന് ഏറെ വ്യത്യസ്തയും ആകാംക്ഷയും നൽകുന്നതുമായിരുന്നു വീഡിയോ. അതുകൊണ്ട് തന്നെ ചിത്രം എത്തുന്നത് ലോക സിനിമ ചരിത്രത്തിൽ തന്നെ ഇടം നേടിക്കൊണ്ടായിരിക്കുമെന്നാണ് പ്രേക്ഷക പ്രതികരണം