കായംകുളത്ത് കെഎസ്ആർടിസി ബസിനു തീപിടിച്ചു, യാത്രക്കാരെ സുരക്ഷിതരായി മാറ്റി

വെള്ളിയാഴ്ച ആലപ്പുഴ-കായംകുളം ദേശീയ പാതയിൽ കെഎസ്ആർടിസി ബസിനു തീപിടിച്ചപ്പോൾ ബസിലുണ്ടായിരുന്ന യാത്രക്കാർ അത്ഭുതകരമായി രക്ഷപ്പെട്ടു. എംഎസ്എം കോളേജിന് സമീപമായിരുന്നു അപകടം. കരുനാഗപ്പള്ളിയിൽ നിന്ന് തോപ്പുംപടിയിലേക്ക് പോവുകയായിരുന്ന ബസിനാണ് തീപിടിച്ചത്. ബസ് പൂർണമായും കത്തി നശിച്ചു.

ബസിൽ നിന്ന് ദുർഗന്ധം വമിച്ചതിനെ തുടർന്ന് ഡ്രൈവർ യാത്രക്കാരെ വിവരമറിയിക്കുകയായിരുന്നു. തീപിടിത്തമുണ്ടാകുന്നതിന് മുമ്പ് യാത്രക്കാരെ പുറത്തെടുത്തതിനാൽ ആർക്കും പരിക്കില്ല.

അപകടകാരണം വ്യക്തമല്ല. അഗ്നിശമന സേനാംഗങ്ങൾ തീ പൂർണമായും അണച്ചു. സംഭവത്തെക്കുറിച്ച് അന്വേഷിക്കാൻ എംവിഡിയോട് ആവശ്യപ്പെട്ടിട്ടുണ്ടെന്ന് ഗതാഗത മന്ത്രി ഗണേഷ് കുമാർ പറഞ്ഞു.