തിരുവനന്തപുരം കോർപ്പറേഷനിലെ കാപ്പാ കേസ് പ്രതിയും ബിജെപി കൗൺസിലറുമായ ആർ. സുഗതന്റെ വ്യാജ ഒപ്പ് ആരോപണത്തിൽ പൊലീസ് ഇന്ന് കേസെടുക്കും. രേഖകൾ വിശദമായ ഫോറൻസിക് പരിശോധനയ്ക്ക് വിധേയമാക്കുന്നതിന്റെ ഭാഗമായാണ് കേസ് രജിസ്റ്റർ ചെയ്യുന്നത്. പ്രാഥമിക ഘട്ടത്തിൽ ആരെയും പ്രതിചേർക്കാതെയാകും എഫ്ഐആർ തയ്യാറാക്കുക.
കാപ്പാ കേസിൽ ഒളിവിൽ കഴിഞ്ഞിരുന്ന സമയത്ത്, അതായത് ഫെബ്രുവരി 26, മാർച്ച് 11, ഏപ്രിൽ 27 എന്നീ തീയതികളിൽ നടന്ന കൗൺസിൽ യോഗങ്ങളിൽ സുഗതൻ പങ്കെടുത്തതായി ഹാജർ രജിസ്റ്ററിലുണ്ട്. എന്നാൽ ഇത് വ്യാജ ഒപ്പാണെന്നാണ് എൽഡിഎഫിന്റെ പ്രധാന പരാതി. കോൺഗ്രസും ഈ ആരോപണം ഏറ്റെടുത്തിട്ടുണ്ട്. അതേസമയം, വ്യാജ ഒപ്പ് ആരോപണം ബിജെപി പൂർണ്ണമായി തള്ളിക്കളഞ്ഞിട്ടുണ്ട്.
പരാതിയുടെ നിജസ്ഥിതി കണ്ടെത്താൻ രജിസ്റ്റർ ഫോറൻസിക് പരിശോധനയ്ക്ക് അയക്കാനാണ് പൊലീസിന്റെ തീരുമാനം. ഒപ്പം വിവാദ തീയതികളിലെ കൗൺസിൽ ഹാളിന്റെ സിസിടിവി ദൃശ്യങ്ങൾ പരിശോധിക്കുകയും ഉദ്യോഗസ്ഥരുടെ മൊഴിയെടുക്കുകയും ചെയ്യും. ആരോപണം തെളിഞ്ഞാൽ അത് സുഗതന് മാത്രമല്ല, ഹാജർ ബുക്ക് സൂക്ഷിക്കുന്ന മേയറുടെ ഓഫീസിനും വലിയ പ്രതിസന്ധിയായി മാറും.