ന്യൂഡൽഹി: കേന്ദ്ര ചീഫ് ഇലക്ഷൻ കമ്മീഷണർ ജ്ഞാനേഷ് കുമാറിനെ സസ്പെൻഡ് ചെയ്യണമെന്ന് ആവശ്യപ്പെട്ടുള്ള ഹർജിയിൽ അടിയന്തര ഇടക്കാല ഉത്തരവ് പുറപ്പെടുവിക്കാൻ സുപ്രീം കോടതി വിസമ്മതിച്ചു. വെറുമൊരു മാധ്യമ റിപ്പോർട്ടിന്റെ മാത്രം അടിസ്ഥാനത്തിൽ ഭരണഘടനാ സ്ഥാപനങ്ങൾക്കെതിരെ ഉത്തരവിടാനാകില്ലെന്ന് സുപ്രീം കോടതി വ്യക്തമാക്കി. തിരഞ്ഞെടുപ്പ് കമ്മീഷന്റെയും കേന്ദ്ര സർക്കാരിന്റെയും വിശദീകരണം കേട്ട ശേഷമേ കേസിൽ തുടർനടപടികൾ സ്വീകരിക്കാൻ സാധിക്കൂ എന്ന് പരമോന്നത നീതിപീഠം നിരീക്ഷിച്ചു.
വിഷയം പരിശോധിക്കാൻ തിരഞ്ഞെടുപ്പ് കമ്മീഷനും കേന്ദ്ര സർക്കാരിനും കോടതി നോട്ടീസ് അയച്ചിട്ടുണ്ട്. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ മൂന്നംഗ ബെഞ്ചാണ് കേസ് പരിഗണിച്ചത്. കമ്മീഷന്റെ ഭാഗം കേൾക്കാതെ യാതൊരുവിധ അടിയന്തര ഉത്തരവും നൽകാൻ സാധിക്കില്ലെന്ന് കോടതി കടുപ്പിച്ചു പറഞ്ഞു.
മറ്റ് രണ്ട് ഇലക്ഷൻ കമ്മീഷണർമാരുടെയും അനുമതിയില്ലാതെ ചീഫ് ഇലക്ഷൻ കമ്മീഷണർ ഏകപക്ഷീയമായി തീരുമാനങ്ങൾ കൈക്കൊള്ളുന്നുവെന്ന് ആരോപിച്ചാണ് സുപ്രീം കോടതിയിൽ ഹർജി സമർപ്പിക്കപ്പെട്ടത്. ഇതിൽ അടിയന്തരമായി ഇടപെട്ട് അദ്ദേഹത്തെ ചുമതലയിൽ നിന്ന് സസ്പെൻഡ് ചെയ്യണമെന്നായിരുന്നു ഹർജിക്കാരുടെ ആവശ്യം. എന്നാൽ മാധ്യമ റിപ്പോർട്ടുകളെ മാത്രം അടിസ്ഥാനമാക്കി ഇത്തരമൊരു ഗുരുതരമായ ഉത്തരവ് നൽകാനാകില്ലെന്ന് പരമോന്നത നീതിപീഠം ചൂണ്ടിക്കാട്ടി. ഭരണഘടനാ സ്ഥാപനമായ തിരഞ്ഞെടുപ്പ് കമ്മീഷന്റെ ഔദ്യോഗിക വിശദീകരണം വിഷയത്തിൽ അത്യന്താപേക്ഷിതമാണെന്ന് കോടതി നിർദ്ദേശിച്ചു.
ഇലക്ഷൻ കമ്മീഷണർമാരായ സുഖ്ബീർ സിംഗ് സന്ധു, വിവേക് ജോഷി എന്നിവരുടെ എതിർപ്പുകൾ മറികടന്നാണ് ചീഫ് ഇലക്ഷൻ കമ്മീഷണർ പ്രധാന തീരുമാനം എടുത്തതെന്ന മാധ്യമ വാർത്തകൾ മുൻനിർത്തിയായിരുന്നു ഹർജിക്കാരുടെ വാദം. എന്നാൽ കമ്മീഷന്റെ സത്യവാങ്മൂലം ലഭിച്ച ശേഷമേ കൂടുതൽ തീരുമാനങ്ങളിലേക്ക് കടക്കൂ എന്ന് ബെഞ്ച് വ്യക്തമാക്കി.
തിരഞ്ഞെടുപ്പ് കമ്മീഷൻ കൈക്കൊള്ളുന്ന തീരുമാനങ്ങൾ നിയമവിധേയമാണെന്നാണ് പ്രാഥമികമായി കരുതുന്നതെന്ന് വ്യക്തമാക്കിയ സുപ്രീം കോടതി, ഏതെങ്കിലും തീരുമാനം നിയമവിരുദ്ധമാണെന്ന് കണ്ടെത്തിയാൽ അത് റദ്ദാക്കുമെന്നും കൂട്ടിച്ചേർത്തു. മറുപടി നൽകാൻ കേന്ദ്ര സർക്കാരിനും തിരഞ്ഞെടുപ്പ് കമ്മീഷനും സുപ്രീം കോടതി സമയം അനുവദിച്ചിട്ടുണ്ട്. കേസിൽ കമ്മീഷന്റെ നിലപാട് അറിയാൻ വരും ദിവസങ്ങളിൽ സുപ്രീം കോടതി വീണ്ടും വാദം കേൾക്കും.