തുടർച്ചയായ പരാജയങ്ങൾക്ക് ശേഷം വമ്പൻ തിരിച്ചുവരവിലൂടെ മലയാള സിനിമാലോകത്ത് വീണ്ടും സജീവമായിരിക്കുകയാണ് പ്രിയതാരം നിവിൻ പോളി. ‘സർവ്വം മായ’ 100 കോടി ക്ലബ്ബിലും ‘ബെത്ലഹേം കുടുംബ യൂണിറ്റ്’ 300 കോടി ക്ലബ്ബിലും ഇടംനേടിയതോടെ താരം തന്റെ നഷ്ടപ്പെട്ട പ്രതാപം തിരിച്ചുപിടിച്ചിരിക്കുകയാണ്. മറ്റുള്ളവരുടെ അഭിപ്രായങ്ങൾ കേട്ട് ആശയക്കുഴപ്പത്തിലാകുന്നതിന് പകരം, ഇനി മുതൽ സ്വന്തം ബോധ്യങ്ങൾക്കനുസരിച്ച് മാത്രം സിനിമകൾ തിരഞ്ഞെടുക്കാനാണ് തന്റെ തീരുമാനമെന്ന് നിവിൻ വ്യക്തമാക്കി. ഒരു അഭിമുഖത്തിലാണ് താരം തന്റെ കരിയറിലെ പുതിയ മാറ്റങ്ങളെക്കുറിച്ച് മനസ്സ് തുറന്നത്.
രണ്ട് വർഷം മുമ്പ് മുതൽ തന്റെ സിനിമ സംബന്ധമായ തീരുമാനങ്ങൾ താൻ തന്നെയാണ് എടുക്കുന്നതെന്ന് നിവിൻ പോളി പറയുന്നു. മുൻകാലങ്ങളിൽ ചിത്രങ്ങളുടെ നിർമ്മാതാക്കളെ കാണുന്നതും ഡേറ്റ് ചർച്ച ചെയ്യുന്നതുമെല്ലാം മറ്റുള്ളവരായിരുന്നു. എന്നാൽ ആ രീതി താൻ പൂർണ്ണമായി മാറ്റിയെന്നും, തിരക്കഥ ഇഷ്ടപ്പെടുകയാണെങ്കിൽ ആ നിമിഷം തന്നെ ചിത്രത്തിന് പച്ചക്കൊടി കാട്ടാറുണ്ടെന്നുമാണ് താരം വ്യക്തമാക്കുന്നത്. ‘സർവ്വം മായ’, ‘ബെത്ലഹേം’ എന്നീ വലിയ വിജയ ചിത്രങ്ങളും ഈ പുതിയ രീതിയുടെ ഭാഗമായി ഉണ്ടായതാണെന്ന് അദ്ദേഹം കൂട്ടിച്ചേർത്തു.
സിനിമകൾ പരാജയപ്പെട്ടാൽ പോലും അതിന്റെ പൂർണ്ണ ഉത്തരവാദിത്തം തന്റേതായിരിക്കുമെന്നും മറ്റാരെയും കുറ്റപ്പെടുത്തില്ലെന്നും നിവിൻ പോളി വ്യക്തമാക്കി. കരിയർ മികച്ച രീതിയിൽ മുന്നോട്ട് പോകുമ്പോൾ ചുറ്റും നിന്ന് നിരവധി അഭിപ്രായങ്ങൾ വരുന്നത് ആശയക്കുഴപ്പം ഉണ്ടാക്കുമെന്നും, ആ ശബ്ദകോലാഹലങ്ങളെ അകറ്റിനിർത്തുന്നതാണ് ഏറ്റവും നല്ലതെന്നും അദ്ദേഹം പറഞ്ഞു. അതേസമയം, ഒക്ടോബർ ഒന്നിന് ആഗോള റിലീസായി തിയേറ്ററുകളിലെത്താൻ ഒരുങ്ങുന്ന ‘യേഴു കടൽ യേഴു മലൈ’ ആണ് നിവിന്റേതായി ഇനി പുറത്തിറങ്ങാനിരിക്കുന്ന പ്രധാന ചിത്രം.