ഷാർജയിലെ ഏറ്റവും തിരക്കേറിയ പ്രദേശങ്ങളിലൊന്നായ അൽതാവൂൻ റൗണ്ട് എബൗട്ടിലെ രൂക്ഷമായ ഗതാഗതക്കുരുക്കിന് പരിഹാരമാകുന്നു. തിരക്കേറിയ സമയങ്ങളിൽ നീണ്ട ഇരുപത് മിനിറ്റിലധികം വാഹനങ്ങൾ കുടുങ്ങിക്കിടന്നിരുന്ന ഈ ഭാഗത്തിന്റെ പുതിയ രൂപകൽപന ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി ഔദ്യോഗികമായി പുറത്തുവിട്ടു. റൗണ്ട് എബൗട്ടിന് താഴെയായി നിർമ്മിച്ചിരിക്കുന്ന 500 മീറ്റർ നീളമുള്ള അൽ താവൂൻ ടണലാണ് ഈ പദ്ധതിയിലെ ഏറ്റവും പ്രധാനപ്പെട്ട പ്രത്യേകത. ഓരോ ദിശയിലും മൂന്ന് വീതം വരിപ്പാതകളുള്ള ഈ ടണൽ അൽ താവൂൻ തെരുവിനെ അൽ നഹ്ദ പാലവുമായും ദുബായുമായും നേരിട്ട് ബന്ധിപ്പിക്കാൻ സഹായിക്കും.
വരാനിരിക്കുന്ന ഷാർജ രാജ്യാന്തര പുസ്തകമേളയുടെ ഉദ്ഘാടന ദിനമായ നവംബർ നാലിനാണ് ഈ പുതിയ ഗതാഗത സംവിധാനം പൊതുജനങ്ങൾക്കായി തുറന്നുകൊടുക്കുന്നത്. തിരക്കുള്ള സമയങ്ങളിൽ മണിക്കൂറിൽ ഓരോ ദിശയിലും 4,200-ഓളം വാഹനങ്ങൾ സുഗമമായി കൈകാര്യം ചെയ്യാൻ കഴിയുന്ന അത്യാധുനിക സിഗ്നൽ ജംങ്ഷനും പദ്ധതിയിൽ ഉൾപ്പെടുത്തിയിട്ടുണ്ട്. ഷാർജ എക്സ്പോ സെന്ററിലേക്കുള്ള യാത്രാ സൗകര്യം സുഗമമാക്കാൻ കൂടി ലക്ഷ്യമിട്ടാണ് ഈ മാറ്റം. പദ്ധതിയുടെ പൂർണ്ണരൂപം 2027 ഫെബ്രുവരിയോടെ പൂർത്തിയാകുമെന്നും, പണികളുടെ ഭാഗമായി താൽക്കാലികമായി നീക്കം ചെയ്ത പഴയ സ്മാരകം പിന്നീട് പുനഃസ്ഥാപിക്കുമെന്നും അധികൃതർ അറിയിച്ചു.