ഷിക്കാഗോ: മലങ്കര ഓർത്തഡോക്സ് കിസ്റ്റർ സൊസൈറ്റിയുടെ രണ്ടാമത് ഫുഡ് ഫെസ്റ്റിവലും കാർണിവലും ആലുവയുടെ എംഎൽഎ ശ്രീ. അൻവർ സാദത്ത് ഉദ്ഘാടനം ചെയ്തു.രാവിലെ 11 മണിക്ക് ആരംഭിച്ച ഈ കലാകായിക രുചിക്കൂട്ട് സംഗമം വൈകുന്നേരം 6 മണി വരെ നീണ്ടു നിന്നു. ഷിക്കാഗോയുടെ പ്രാന്തപ്രദേശത്ത് നിന്ന് ആയിരക്കണക്കിന് ആളുകൾ തങ്ങളുടെ കുട്ടികളുമായി ഈ സംഗമത്തിൽ പങ്കെടുക്കാനെത്തിയിരുന്നു. തമ്മിൽ കാണുന്നതിനും പരിചയം പുതുക്കുന്നതിനും സൗഹ്യദങ്ങൾ പങ്ക് വയ്ക്കുന്നതിനുമുള്ള ഒരു വേദിയായി ഇങ്ങനെയുള്ള പരിപാടികൾ പ്രയോജനപ്പെടണമെന്ന് എംഎൽഎ അൻവർ സാദത്ത് അഭിപ്രായപ്പെട്ടു.
തൻ്റെ അമേരിക്കൻ സന്ദർശനത്തിൽ ആദ്യമായി പങ്കെടുക്കുന്ന ഒരു പരിപാടി ആയതിനാൽ ഇത് തൻ്റെ മനസ്സിൽ എന്നും തങ്ങി നിൽക്കുമെന്നും അദ്ദേഹം കുട്ടിച്ചേർത്തു.
മോക്സ് പ്രസിഡൻ്റ് ഡോ. ബിനു ഫിലിപ്പ് എല്ലാവർക്കും സ്വാഗതം ആശംസിച്ചു. ജനറൽ കൺവീനർ ഏബ്രഹാം വർക്കി എംഎൽഎ അൻവർ സാദത്തിനെ സദസ്സിന് പരിചയപ്പെടുത്തി. വളരെ ചുരുങ്ങിയ സമയത്തിനുള്ളിൽ തങ്ങളുടെ ക്ഷണം സ്വീകരിച്ചെത്തിയ എംഎൽഎ യ്ക്ക് ഡോ. ഏബ്രഹാം ജോസഫ് നന്ദി രേഖപ്പെടുത്തി
കുട്ടികൾക്കായുള്ള ഫെയ്സ് പെയിന്റിങ്ങുകൾക്കും മെഹന്തിക്കും വലിയ നിര തന്നെ ഉണ്ടായിരുന്നു. വിവിധ റസ്റ്ററൻ്റുകളുടെ സ്റ്റാളുകളിൽ വിവിധയിനം ഭക്ഷണങ്ങൾ നൽകിയതിലൂടെ ആളുകൾക്ക് തങ്ങളുടെ രുചിഭേദമനുസരിച്ച് ഭക്ഷണങ്ങൾ തെരഞ്ഞെടുക്കാൻ അതൊരവസരമായി.
സ്റ്റേജുകളിൽ തങ്ങളുടെ കലാപരിപാടികൾ അവതരിപ്പിക്കാൻ അവസരം നൽകിയതിലൂടെ മോഹിനിയാട്ടം, നാടോടിനൃത്തം തുടങ്ങി അനേകം ശാസ്ത്രീയ നടനങ്ങളും ഗാനമേളകളും നടത്തുവാൻ ധാരാളം കലാകാരന്മാരും മുമ്പോട്ട് വന്നു.
ഈ പരിപാടി ഒരു വമ്പിച്ച വിജയമാക്കിയ ഷിക്കാഗോ നിവാസികളോട് സെക്രട്ടറി അജിത്ത് ഏലിയാസ്, ജോയിൻ്റ് കൺവീനേഴ്സ് ആയ ഏലിയാസ് തോമസ്, ജിജി ജോൺ, ഫുഡ് കമ്മിറ്റി കൺവീനേഴേസ് ആയ ഏലിയാമ്മ പുന്നൂസ്, ആൽബിൻ ഏബ്രഹാം, ഫൈനാൻസ് കമ്മിറ്റി ചെയർപേഴ്സൺ, ഫിലിപ്പ് കുന്നേൽ ജോസഫ് എന്നിവർ നന്ദി അറിയിച്ചു. സിബിൽ ഫിലിപ്പ്, നിഷാ ജോണി എന്നിവർ എം. സി. മാരായി പ്രവർത്തിച്ചു.