നീറ്റ് പരീക്ഷാ ക്രമക്കേടുകളെത്തുടർന്നുള്ള വിദ്യാർത്ഥി പ്രതിഷേധങ്ങൾക്കൊടുവിൽ രാജിവെച്ച കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാനെ പ്രശംസിച്ച് കുറിപ്പിട്ട കേരള കേന്ദ്ര സർവകലാശാല നടപടി വിവാദത്തിൽ. സർവകലാശാലയുടെ ഔദ്യോഗിക സോഷ്യൽ മീഡിയ പ്ലാറ്റ്ഫോമുകളിലൂടെയാണ് മന്ത്രിയുടെ സംഭാവനകൾക്ക് നന്ദി രേഖപ്പെടുത്തുകയും ഭാവി പ്രവർത്തനങ്ങൾക്ക് ആശംസകൾ നേരുകയും ചെയ്ത് പോസ്റ്റുകൾ പങ്കുവെച്ചത്. രാജ്യത്തിനും ഉന്നത വിദ്യാഭ്യാസ മേഖലയ്ക്കും ദേശീയ വിദ്യാഭ്യാസ നയം നടപ്പിലാക്കുന്നതിനും അദ്ദേഹം നൽകിയ മികച്ച സേവനങ്ങളെ കുറിപ്പിൽ എടുത്തുപറയുന്നുണ്ട്.
എന്നാൽ, ശക്തമായ യുവജന പ്രതിഷേധത്തെത്തുടർന്ന് രാജി നൽകി മണിക്കൂറുകൾക്കകം സർവകലാശാല അധികൃതർ ഇത്തരമൊരു പുകഴ്ത്തൽ നടത്തിയത് വിദ്യാർത്ഥികളെ പ്രകോപിപ്പിച്ചിട്ടുണ്ട്. സർവകലാശാലയുടെ ഇൻസ്റ്റാഗ്രാം, ഫേസ്ബുക്ക് പേജുകളിലെ കുറിപ്പുകൾക്ക് താഴെ രൂക്ഷമായ വിമർശനങ്ങളും ട്രോളുകളുമായാണ് വിദ്യാർത്ഥികൾ രംഗത്തെത്തിയിരിക്കുന്നത്. പ്രതിഷേധം ശക്തമായിട്ടും ഔദ്യോഗിക പോസ്റ്റ് പിൻവലിക്കാനോ വിഷയത്തിൽ വിശദീകരണം നൽകാനോ സർവകലാശാല അധികൃതർ തയ്യാറായിട്ടില്ല.