നീറ്റ്-യുജി 2026 ചോദ്യപേപ്പർ ചോർച്ചയിൽ പ്രതിഷേധിച്ച് ആക്ടിവിസ്റ്റ് സോനം വാങ്ചുക്ക് നടത്തുന്ന നിരാഹാര സമരത്തെ നടി ദീപിക പദുക്കോൺ പിന്തുണച്ചുവെന്ന തരത്തിൽ സോഷ്യൽ മീഡിയയിൽ പ്രചരിക്കുന്ന സ്ക്രീൻഷോട്ട് വ്യാജം. ദീപിക തന്റെ ഇൻസ്റ്റാഗ്രാം സ്റ്റോറിയിലൂടെ രാഷ്ട്രീയ പ്രസ്താവന നടത്തിയെന്ന രീതിയിലാണ് ചിത്രം പ്രചരിക്കുന്നത്. എന്നാൽ, ഇത് പൂർണ്ണമായും എഐ ഉപയോഗിച്ച് നിർമ്മിച്ച വ്യാജ സ്ക്രീൻഷോട്ടാണെന്ന് തെളിഞ്ഞു.
ഈ വ്യാജ പ്രചാരണത്തിനെതിരെ ദീപികയുടെ ആരാധകർ ശക്തമായ പ്രതിഷേധവുമായി രംഗത്തെത്തിയിരിക്കുകയാണ്. നടി ഇപ്പോൾ ഗർഭിണിയാണെന്നിരിക്കെ, ഇത്തരമൊരു വ്യാജ വാർത്ത പ്രചരിപ്പിക്കുന്നത് അങ്ങേയറ്റം ക്രൂരവും അധാർമികവുമാണെന്ന് ആരാധകർ വിമർശിക്കുന്നു. ഇത്തരം തരംതാണ പരിപാടികളിലൂടെ ഗർഭിണിയായ നടിയെ വിവാദങ്ങളിലേക്ക് വലിച്ചിഴയ്ക്കാൻ ശ്രമിക്കുന്നത് അംഗീകരിക്കാനാവില്ലെന്നും സോഷ്യൽ മീഡിയ ഉപയോക്താക്കൾ അഭിപ്രായപ്പെടുന്നു.
ദീപികയുടെ ഔദ്യോഗിക സോഷ്യൽ മീഡിയ അക്കൗണ്ടുകളിലോ വിശ്വസനീയമായ വാർത്താ മാധ്യമങ്ങളിലോ ഇത്തരമൊരു പോസ്റ്റ് വന്നിട്ടില്ല. ചിത്രത്തിലെ അക്ഷരങ്ങളും ഡിജിറ്റൽ പാറ്റേണുകളും പരിശോധിച്ചതിൽ നിന്ന് ഇത് കൃത്രിമമായി നിർമ്മിച്ചതാണെന്ന് വ്യക്തമാണ്. ദീപിക അത്തരമൊരു സ്റ്റോറി പങ്കുവെച്ചിട്ടില്ലെന്ന് ആരാധകർ ഇതിനകം തന്നെ ഉറപ്പിച്ചു പറയുന്നു.
അതേസമയം, ജന്തർ മന്തറിൽ സോനം വാങ്ചുക്ക് നടത്തുന്ന നിരാഹാര സമരം 18 ദിവസമായി തുടരുകയാണ്. നീറ്റ് പരീക്ഷാ ക്രമക്കേടിൽ വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യപ്പെട്ടാണ് പ്രതിഷേധം. വാങ്ചുക്കിന്റെ ആരോഗ്യനില വഷളായതിനെത്തുടർന്ന് അദ്ദേഹത്തിന് അടിയന്തര ചികിത്സ ലഭ്യമാക്കണമെന്നാവശ്യപ്പെട്ട് ഡൽഹി ഹൈക്കോടതിയിൽ ഹർജി നൽകിയിട്ടുണ്ട്.