മഹാരാഷ്ട്രയിലെ പ്രമുഖ വ്യവസായി കേതൻ അഗർവാളിനെ പ്രതിശ്രുത വധു സിയ ഗോയലും കാമുകനും ചേർന്ന് കൊലപ്പെടുത്തിയ കേസിൽ നിർണായക തെളിവുകൾ പുറത്തുവിട്ട് പൂണെ പോലീസ്. മുൻപ് വലിയ ചർച്ചയായ സോനം രഘുവംശി കൊലപാതക കേസ് ഓൺലൈനിലൂടെ വിശദമായി പഠിച്ചാണ് സിയയും കാമുകൻ ചേതൻ ചൗധരിയും ഈ ക്രൂരകൃത്യം ആസൂത്രണം ചെയ്തതെന്ന് പോലീസ് കണ്ടെത്തി. സിയയുടെ മൊബൈൽ ഫോൺ രേഖകളും ഇന്റർനെറ്റ് സെർച്ച് ഹിസ്റ്ററിയുമാണ് കേസിൽ വഴിത്തിരിവായത്.
ഭർത്താവിനെ കൊല്ലാൻ സോനം രഘുവംശി മെനഞ്ഞ പദ്ധതികളെക്കുറിച്ച് സിയയും കാമുകനും ഇന്റർനെറ്റിൽ വിശദമായി വായിച്ചിരുന്നു. പഴയ കേസിൽ പോലീസിന് ലഭിച്ച തെളിവുകൾ എന്തൊക്കെയാണെന്ന് മനസ്സിലാക്കിയ സിയ, താൻ പിടിക്കപ്പെടാതിരിക്കാൻ കൂടുതൽ സുരക്ഷിതമായ വ്യാജ തെളിവുകളും മികച്ച അലബൈകളും (കൃത്യം നടന്ന സമയത്ത് താൻ മറ്റൊരിടത്തായിരുന്നു എന്ന വാദം) മുൻകൂട്ടി തയ്യാറാക്കി. മേഘാലയയിലെ ഷില്ലോങ്ങിൽ നടന്ന രാജാ രഘുവംശി കൊലപാതകക്കേസിൽ സോനം ഭർത്താവിനെ കൊന്ന ശേഷം മൃതദേഹം മലഞ്ചെരിവിലേക്ക് തള്ളുകയായിരുന്നു. എന്നാൽ പുണെയിലെ കേസിൽ, കേതനെ തനിയെ തള്ളി താഴെയിട്ടാൽ മരണം ഉറപ്പാകില്ലെന്ന് മനസ്സിലാക്കിയ സിയ, കാമുകനായ ചേതൻ ചൗധരിയെയും ഒപ്പം കൂട്ടി ലോഹഗഡ് കോട്ടയിലെ ട്രെക്കിങ്ങിനിടെ കേതനെ ജീവനോടെ കൊക്കയിലേക്ക് തള്ളിയിടുകയായിരുന്നു.
സിയയുടെ മൊബൈൽ ഫോൺ പരിശോധിച്ച പോലീസിന് ഞെട്ടിക്കുന്ന വിവരങ്ങളാണ് ലഭിച്ചത്. രാജാ രഘുവംശി കൊലപാതകക്കേസിന്റെ വാർത്തകൾ, പോലീസ് കസ്റ്റഡിയിൽ സ്ത്രീകളെ മർദിക്കാറുണ്ടോ, ജയിലിൽ വനിതാ തടവുകാർക്കുള്ള അവകാശങ്ങൾ എന്തൊക്കെയാണ് എന്നിങ്ങനെയാണ് കൊലപാതകം ആസൂത്രണം ചെയ്യുന്നതിനിടയിൽ സിയ ഇന്റർനെറ്റിൽ തിരഞ്ഞ കാര്യങ്ങൾ. താൻ പിടിക്കപ്പെട്ടാൽ ജയിലിൽ നേരിടേണ്ടി വരുന്ന സാഹചര്യങ്ങളെക്കുറിച്ച് പോലും കുറ്റകൃത്യത്തിന് മുൻപ് സിയ ഗൂഢാലോചന നടത്തിയിരുന്നു എന്നാണ് ഇതിൽ നിന്നും വ്യക്തമാകുന്നത്. സിയയുടെ വീട്ടിൽ നിന്ന് കണ്ടെടുത്ത രണ്ടാമത്തെ മൊബൈൽ ഫോൺ നിലവിൽ ഫോറൻസിക് പരിശോധനയ്ക്കായി അയച്ചിരിക്കുകയാണ്.
കേതന്റെ മരണം അപകടമാണെന്ന് കുടുംബം വിശ്വസിച്ചിരുന്നില്ല. എന്നാൽ ലോഹഗഡ് കോട്ടയിൽ വെച്ച് അദ്ദേഹം വീണുവെന്ന് പറയുന്ന സ്ഥലം അത്ര അപകടകരമായ ഒന്നല്ലായിരുന്നു എന്നത് പോലീസിൽ സംശയമുണ്ടാക്കി. തുടർന്ന് നടത്തിയ ആഴത്തിലുള്ള ചോദ്യം ചെയ്യലിലാണ് പ്രതികളുടെ അലബൈകളുടെ പല അടരുകളും പൊളിച്ച് പോലീസ് കുറ്റസമ്മതത്തിലേക്ക് എത്തിയത്. വിവാഹത്തിൽ നിന്ന് രക്ഷപ്പെടാനുള്ള ഏക വഴി കൊലപാതകമാണെന്ന് സിയ വിശ്വസിച്ചിരുന്നതായി പോലീസ് പറയുന്നു. ജുഡീഷ്യൽ കസ്റ്റഡിയിലുള്ള സിയ ഗോയലിനും ചേതൻ ചൗധരിക്കും തങ്ങൾ ചെയ്ത ക്രൂരതയിൽ യാതൊരുവിധ കുറ്റബോധവുമോ പശ്ചാത്താപമോ ഇല്ലെന്ന് അന്വേഷണ ഉദ്യോഗസ്ഥർ വ്യക്തമാക്കുന്നു.