ഘോഷയാത്രയ്ക്കിടെ ക്ഷേത്രത്തിൽ പ്രവേശിക്കാൻ ശ്രമിച്ചു; ദളിത് പുരുഷന്മാർക്ക് നേരെ ആൾകൂട്ട അക്രമണം

ജയ്പൂർ: രാജസ്ഥാനിലെ ചുരു ജില്ലയിലെ ഒരു ഗ്രാമത്തിൽ മതപരമായ ഘോഷയാത്രയ്ക്കിടെ ക്ഷേത്രത്തിൽ പ്രവേശിക്കാൻ ശ്രമിച്ച ദളിത് പുരുഷന്മാരെ ഒരു കൂട്ടം ആളുകൾ ആക്രമിച്ചതായി പരാതി. ഞായറാഴ്ച സദാസർ ഗ്രാമത്തിൽ നടന്ന ഈ സംഭവം വലിയ പ്രതിഷേധങ്ങൾക്ക് വഴിവെക്കുകയായിരുന്നു.

കാനം മേഘ്‌വാൾ എന്ന വ്യക്തി നൽകിയ പരാതി പ്രകാരം, ഞായറാഴ്ച വൈകുന്നേരം ‘ഭാഗവത കഥ’യുടെ സമാപനത്തിന് ശേഷം നടന്ന ‘ശോഭായാത്ര’യ്ക്കിടെയാണ് സംഭവം നടന്നത്. ഘോഷയാത്ര ക്ഷേത്രത്തിൽ എത്തിയപ്പോൾ, മേഘ്‌വാളും മറ്റുള്ളവരും ദർശനത്തിനായി ശ്രീകോവിലിലേക്ക് പ്രവേശിക്കാൻ ശ്രമിച്ചു. ഈ സമയം, സൂർദാസ് സ്വാമി, ശങ്കർലാൽ, ഹിമ്മത് കുമാർ, അനിൽ എന്നിവരുൾപ്പെടെയുള്ള ഗ്രാമവാസികൾ ഇവരെ തടയുകയും ആക്രമിക്കുകയും ചെയ്തെന്ന് പരാതിയിൽ പറയുന്നു. ദളിതരായതുകൊണ്ടാണ് തങ്ങളെ ക്ഷേത്രത്തിൽ പ്രവേശിക്കാൻ അനുവദിക്കാത്തതെന്നും പരാതിക്കാരൻ ആരോപിച്ചു.

അതേസമയം, ക്ഷേത്ര കവാടത്തിൽ വലിയ തിരക്ക് കാരണം ഇരുവിഭാഗങ്ങളും തമ്മിൽ തർക്കമുണ്ടായതാണെന്നും, കാത്തിരിക്കാൻ ആവശ്യപ്പെട്ടപ്പോൾ സംഘർഷമുണ്ടായതാണെന്നും ഡിഎസ്പി സത്യനാരായണ ഗോദാര പറഞ്ഞു. സംഭവത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്.