വീണ്ടും വരുമോ എഐ വിപ്ലവം: ഡീപ്‍സീക്ക് ഒരു നൂതന എഐ ഏജന്‍റിന്‍റെ പണിപ്പുരയിലെന്ന് റിപ്പോർട്ട്

ചൈനീസ് ആർട്ടിഫിഷ്യൽ ഇന്‍റലിജൻസ് കമ്പനിയായ ഡീപ്‍സീക്ക് ഒരു നൂതന എഐ ഏജന്‍റിന്‍റെ പണിപ്പുരയിലെന്ന് റിപ്പോർട്ട്. ഡീപ്‌സീക്കിന്‍റെ വരാനിരിക്കുന്ന ഈ എഐ ഏജന്‍റിന് സങ്കീർണ്ണമായ ജോലികൾ കുറഞ്ഞ ഇൻപുട്ട് ഉപയോഗിച്ച് പൂർത്തിയാക്കാൻ കഴിയുമെന്നും കാലക്രമേണ പഠിക്കാനും മെച്ചപ്പെടുത്താനും കഴിയുന്ന വിധത്തിലുള്ളതാകുമെന്നാണ് രാജ്യാന്തര മാധ്യമമായ ബ്ലൂംബെർഗ് റിപ്പോർട്ട് ചെയ്യുന്നത്. ഒരു ഉപയോക്താവ് അതിനോട് ഇടപഴകുന്നതിനനുസരിച്ച് പഠിക്കുകയും വളരുകയും ചെയ്യുന്ന സിസ്റ്റം ആണിതെന്നാണ് റിപ്പോർട്ടുകൾ സൂചിപ്പിക്കുന്നത്. ഈ വർഷം നാലാം പാദത്തിലാണ് സവിശേഷ എഐ ഏജന്‍റ് പുറത്തിറക്കാൻ ഡീപ്‌സീക്ക് സ്ഥാപകൻ ലിയാങ് വെൻഫെങ് പദ്ധതിയിട്ടിരിക്കുന്നത്. കൂടുതൽ മേൽനോട്ടമില്ലാതെ സങ്കീർണ്ണമായ പ്രൊഫഷണൽ ജോലികൾ ചെയ്യാൻ കഴിയുന്ന സെമി-ഓട്ടോണമസ് എഐ ഏജന്‍റുമാരെ സൃഷ്‌ടിക്കാൻ പല എഐ കമ്പനികളും ശ്രമിച്ചുകൊണ്ടിരിക്കുന്ന സമയത്താണ് ഈ ലോഞ്ച്. ‌

സമീപ മാസങ്ങളിൽ ആന്ത്രോപിക്, മൈക്രോസോഫ്റ്റ്, ഓപ്പൺഎഐ തുടങ്ങിയ വമ്പൻ കമ്പനികൾ എഐ ഏജന്‍റുകളുടെ പതിപ്പുകൾ പുറത്തിറക്കിയിരുന്നു. ഒരു സെർച്ചിംഗ് നടത്തുന്നതിനേക്കാൾ കൂടുതൽ കാര്യങ്ങൾ എഐ ഏജന്‍റുമാർക്ക് ചെയ്യാൻ കഴിയും. മിക്ക കമ്പനികളും ബിസിനസുകൾക്ക് അവരുടെ ദൈനംദിന പ്രവർത്തനങ്ങളിൽ എഐ മികച്ച രീതിയിൽ സംയോജിപ്പിക്കുന്നതിനുള്ള മാർഗങ്ങളായി മോഡലുകളെ അവതരിപ്പിക്കുന്നു. സങ്കീർണ്ണമായ വർക്ക്ഫ്ലോകൾ ഓട്ടോമേറ്റ് ചെയ്യുന്നതിനും, വലിയ അളവിലുള്ള ഡാറ്റ വിശകലനം ചെയ്യുന്നതിനും, കോഡ് ഡീബഗ് ചെയ്യുന്നതിനും അല്ലെങ്കിൽ ഉപഭോക്താക്കൾക്ക് ഇഷ്‌ടാനുസൃത അനുഭവങ്ങൾ നൽകുന്നതിനും എഐ ഏജന്‍റുമാരെ ഉപയോഗിക്കാം.