ലോകമെമ്പാടുമുള്ള ഭൂകമ്പ സജീവതയിൽ ആശങ്ക വർദ്ധിപ്പിച്ചുകൊണ്ട് വെനിസ്വേലയിലും ജപ്പാനിലും തുടർച്ചയായ ഭൂചലനങ്ങൾ. വെനിസ്വേലയിൽ ബുധനാഴ്ച വൈകുന്നേരം വളരെ ചെറിയ ഇടവേളയിൽ 7.2, 7.5 തീവ്രതയുള്ള രണ്ട് ശക്തമായ ഭൂകമ്പങ്ങളാണ് ഉണ്ടായതെന്ന് യുഎസ് ജിയോളജിക്കൽ സർവേ (USGS) റിപ്പോർട്ട് ചെയ്യുന്നു. 7.2 തീവ്രതയുള്ള ആദ്യ ഭൂചലനം ഉണ്ടായി വെറും 39 സെക്കൻഡുകൾക്കുള്ളിലാണ് 7.5 തീവ്രതയുള്ള രണ്ടാമത്തെ ഭൂകമ്പം ഉണ്ടായത്. തലസ്ഥാനമായ കാരക്കാസിൽ കെട്ടിടങ്ങൾക്ക് കേടുപാടുകൾ സംഭവിച്ചതായും അയൽരാജ്യമായ കൊളംബിയയിലും പ്രകമ്പനം അനുഭവപ്പെട്ടതായും റിപ്പോർട്ടുകളുണ്ട്.
വെനിസ്വേലയുടെ വടക്കൻ മേഖലയിൽ ഒരേ സമയം വിറയൽ അനുഭവപ്പെട്ടത് വലിയ പരിഭ്രാന്തിയാണ് സൃഷ്ടിച്ചത്. ഇതിനു പിന്നാലെയാണ് വ്യാഴാഴ്ച വടക്കൻ ജപ്പാനിലെ ഇവാട്ടെ തീരത്ത് 6.9 തീവ്രത രേഖപ്പെടുത്തിയ മറ്റൊരു ഭൂകമ്പം റിപ്പോർട്ട് ചെയ്തത്. 50 കിലോമീറ്റർ താഴ്ചയിൽ പ്രഭവകേന്ദ്രമുണ്ടായിരുന്നെങ്കിലും സുനാമി മുന്നറിയിപ്പുകൾ നൽകിയിട്ടില്ലെന്ന് ജപ്പാൻ കാലാവസ്ഥാ ഏജൻസി വ്യക്തമാക്കി. ഹച്ചിനോഹെ നഗരത്തിൽ ഗതാഗതം ഉൾപ്പെടെയുള്ള സൗകര്യങ്ങൾ തടസ്സമില്ലാതെ തുടരുന്നുണ്ടെന്നത് ആശ്വാസകരമാണ്
സാധ്യതയുള്ള രാജ്യങ്ങളിലൊന്നാണ് ജപ്പാൻ. ‘റിംഗ് ഓഫ് ഫയർ’ എന്നറിയപ്പെടുന്ന ഭൂപ്രദേശത്ത് സ്ഥിതി ചെയ്യുന്ന ജപ്പാൻ, ആഗോള ഭൂകമ്പ പ്രവർത്തനങ്ങളുടെ ഏകദേശം 18 ശതമാനവും അനുഭവിക്കുന്നുണ്ട്. ഈ വർഷം ഏപ്രിലിൽ ഇവാട്ടെ തീരത്ത് ഉണ്ടായ 7.7 തീവ്രതയുള്ള ഭൂകമ്പത്തിന് പിന്നാലെ, ശക്തമായ തുടർചലനങ്ങൾക്ക് സാധ്യതയുണ്ടെന്ന് അധികൃതർ നേരത്തെ തന്നെ മുന്നറിയിപ്പ് നൽകിയിരുന്നു.
തുടർച്ചയായി ഉണ്ടാകുന്ന ഇത്തരം ഭൂകമ്പങ്ങൾ ഭൂമിയുടെ ടെക്റ്റോണിക് പ്ലേറ്റുകളിൽ വലിയ മാറ്റങ്ങൾ സംഭവിക്കുന്നുണ്ടെന്ന സൂചനയാണ് നൽകുന്നത്. വെനിസ്വേലയിലും ജപ്പാനിലും റിപ്പോർട്ട് ചെയ്ത ഭൂചലനങ്ങൾ വലിയ നാശനഷ്ടങ്ങളിലേക്ക് നയിക്കാതിരുന്നത് ആശ്വാസകരമാണെങ്കിലും, പ്രകൃതിയുടെ ഈ അപ്രതീക്ഷിത മാറ്റങ്ങൾ ലോകത്തെ ഒട്ടാകെ ആശങ്കയിലാഴ്ത്തിയിരിക്കുകയാണ്. വരും ദിവസങ്ങളിൽ കൂടുതൽ ജാഗ്രത പാലിക്കണമെന്നാണ് ഭൂഗർഭ ശാസ്ത്രജ്ഞരുടെ നിർദ്ദേശം. പ്രകൃതിക്ഷോഭങ്ങളെ നേരിടാൻ ലോകരാജ്യങ്ങൾ കൂടുതൽ സജ്ജമാകേണ്ടതിന്റെ ആവശ്യകതയാണ് ഇത്തരം സംഭവങ്ങൾ വീണ്ടും ഓർമ്മിപ്പിക്കുന്നത്.