ഓട്ടോമാറ്റിക് പതിപ്പിന് കൂടുതൽ ബജറ്റ് വില:ഓറയ്ക്ക് പുതിയ S AMT വേരിയന്റുമായി ഹ്യുണ്ടായി

ഇപ്പോൾ ഓറ കോംപാക്റ്റ് സെഡാന് ‘S AMT’ എന്ന പുതിയ എൻട്രി ലെവൽ വേരിയന്റ് അവതരിപ്പിച്ചിരിക്കുകയാണ് ഹ്യുണ്ടായി. ഓട്ടോമാറ്റിക് പതിപ്പിനെ കൂടുതൽ ബജറ്റ് വിലയ്ക്ക് എത്തിക്കുന്ന ഈ വേരിയന്റ്, ഇതിന് തുല്യമായ S MT വേരിയന്റിനേക്കാൾ 70,000 രൂപ കൂടുതൽ വിലയ്ക്കാണ് എത്തുന്നത്. അതായത് 8.07 ലക്ഷം രൂപയാണ് വാഹനത്തിന്റെ എക്സ്-ഷോറൂം വില. അതേ ഫീച്ചർ ലിസ്റ്റും ഡിസൈൻ ഘടകങ്ങളുമായി തന്നെയാണ് ഈ പുതിയ പതിപ്പ് എത്തുന്നത്. ഈ പുതിയ S AMT പതിപ്പിന്റെ ഹുഡിനടിയിൽ വന്നിരിക്കുന്ന ഹൃദയം എന്നത് ഹ്യുണ്ടായിയുടെ 1.2 ലീറ്റർ യൂണിറ്റാണ്. ഈ എഞ്ചിൻ 82 ബിഎച്ച്പി കരുത്തും 114 Nm ടോർക്കും ഉത്പാദിപ്പിക്കുന്നു. ഈ സജ്ജീകരണം അഞ്ച് സ്പീഡ് ഓട്ടോമേറ്റഡ് മാനുവൽ ട്രാൻസ്മിഷൻ (AMT) സിസ്റ്റവുമായി കണക്ട് ചെയ്തിരിക്കുന്നു.

വിലയുടെ കാര്യത്തിലേക്ക് വന്നാൽ 8.07 ലക്ഷം രൂപ എന്ന പ്രൈസ്ടാഗ് ഇതിനെ അതിന്റെ പ്രധാന എതിരാളികളായ ഡിസയറിന്റെയും അമേസിന്റെയും ഏറ്റവും താങ്ങാനാവുന്ന മോഡലാക്കുന്നു. ഇവയുടെ എൻട്രി ലെവൽ AT വേരിയന്റുകൾക്ക് യഥാക്രമം 8.34 ലക്ഷം രൂപയും 9.39 ലക്ഷം രൂപയുമാണ് വില വരുന്നത്. ടാറ്റ ടിഗോറിന്റെ എൻട്രി ലെവൽ AT വേരിയന്റിന് 7.35 ലക്ഷം രൂപയാണ് വില. എന്നാൽ ഈ വാഹനം മോഡൽ നിരയിൽ മറ്റുള്ളവയെ അപേക്ഷിച്ച് ഒരു സെഗ്മെന്റ് താഴെയാണ്. ഓറ എസിന്റെ ഫീച്ചർ ഹൈലൈറ്റുകളിൽ ESC, LED DRL-കൾ, ആറ് എയർബാഗുകൾ, ഹൈലൈൻ TPMS, ഇന്റഗ്രേറ്റഡ് ORVM-കളുള്ള പവർ മിററുകൾ എന്നിവ ഉൾപ്പെടുന്നു.

വിശാലമായ ഒരു കൂട്ടം ഉപഭോക്താക്കൾക്ക് സ്മാർട്ട് മൊബിലിറ്റി ലഭ്യമാക്കാൻ എച്ച്എംഐഎല്ലിൽ തങ്ങൾ പ്രതിജ്ഞാബദ്ധരാണ് എന്ന് പുതിയ വേരിയന്റിന്റെ അവതരണത്തെക്കുറിച്ച് ഹ്യുണ്ടായി മോട്ടോർ ഇന്ത്യ ലിമിറ്റഡ് ഡയറക്ടറും ചീഫ് ഓപ്പറേറ്റിംഗ് ഓഫീസറുമായ തരുൺ ഗാർഗ് പറഞ്ഞു. ഹ്യുണ്ടായി ഓറ എസ് എഎംടിയിൽ ഒരു നൂതന എഎംടി ട്രാൻസ്മിഷൻ അവതരിപ്പിക്കുന്നത് സാങ്കേതികവിദ്യയെ വിപുലീകരിക്കുന്നതിനും ഉപഭോക്താക്കൾക്ക് സൗകര്യം വർദ്ധിപ്പിക്കുന്നതിനുമുള്ള തങ്ങളുടെ നിരന്തരമായ ശ്രമങ്ങളെ പ്രതിഫലിപ്പിക്കുന്നു എന്നും അദ്ദേഹം കൂട്ടിച്ചേർത്തു. ഈ പുതിയ മോഡലിന്റെ ആമുഖത്തോടെ, താങ്ങാനാവുന്ന വിലയിൽ മികച്ച സുഖസൗകര്യങ്ങൾ, സുരക്ഷ, പ്രകടനം എന്നിവ വാഗ്ദാനം ചെയ്തുകൊണ്ട് എൻട്രി ലെവൽ ഓട്ടോമാറ്റിക് സെഗ്‌മെന്റിൽ കാര്യമായ ഒരു മുന്നേറ്റമാണ് ഹ്യുണ്ടായിയുടെ ലക്ഷ്യം..